សូមស្វាគមន៏ប្រិយមិត្តដែលបានមកកាន់គេហទំព័រ www.forestincambodia.blogspot.com សូមអរគុណ និង អរព្រះគុណ! សូមចូលរួមរក្សាព្រៃឈឺទាំងអស់គ្នា !!!

Thursday, February 5, 2015

ពលរដ្ឋ​រតនគិរី​ចោទ​ក្រុមហ៊ុន​ចម្ការ​កៅស៊ូ​ថា​ឈូស​ឆាយ​ដី​ដំណាំ​និង​ផ្នូរ​កប់​សព​ដូនតា

ដោយ រដ្ឋា វិសាល 2015-02-04 From RFA
ជម្លោះ​ដីធ្លី ​រតនគិរី ៦២០
គ្រឿងចក្រ​ក្រុមហ៊ុន ស្វីស រ៉ាប់ប៊ឺ (Swift Rubber Rattanakiri Plantation) ឈូស​ឆាយ​ដី​នៅ​ចំណុច​ភូមិ​ថារ៉ងជង ឃុំ​អូរជុំ ស្រុក​អូរជុំ ខេត្ត​រតនគិរី។ រូបថត​ថ្ងៃ​ទី​៣ ខែ​កុម្ភៈ ឆ្នាំ​២០១៥
ក្រុមហ៊ុន​ចម្ការ​កៅស៊ូ ស្វីស រ៉ាប់ប៊ឺ នៅ​ខេត្ត​រតនគិរី (Swift Rubber Rattanakiri Plantation) បាន​ឈូស​ឆាយ​ដី​ដាំ​កៅស៊ូ​ជា​ថ្មី បន្ទាប់​ពី​ប្រជាពលរដ្ឋ​ជាង ៣០០​នាក់​បាន​ធ្វើ​បាតុកម្ម​ប្រឆាំង​ការ​ឈូស​ឆាយ​នេះ កាល​ពី​ឆ្នាំ​២០១៤។ អ្នក​ភូមិ​ចោទ​ថា ក្រុមហ៊ុន​បាន​ឈូស​បំផ្លាញ​ដំណាំ​ប្រជាពលរដ្ឋ និង​ឈូស​ឆាយ​តំបន់​កប់​សព​សហគមន៍​ជនជាតិ​ដើម​ភាគ​តិច​បន្ថែម​ទៀត។
ប្រជាពលរដ្ឋ​ខ្មែរ និង​ជនជាតិ​ដើម​ភាគ​តិច ចោទ​ប្រកាន់​ក្រុមហ៊ុន ស្វីស រ៉ាប់ប៊ឺ ដែល​វិនិយោគ​ដី​ចម្ការ​កៅស៊ូ​រដ្ឋ​នៅ​ខេត្ត​រតនគិរី ថា​មាន​ចេតនា​បំផ្លិចបំផ្លាញ​ផល​ដំណាំ និង​ប្រមាថ​លើ​វប្បធម៌​ប្រពៃណី​ជនជាតិ​ដើម​ភាគ​តិច។ ការ​ចោទ​ប្រកាន់​នេះ កើត​មាន​ឡើង​បន្ទាប់​ពី​គ្រឿងចក្រ​ក្រុមហ៊ុន កាល​ពី​ថ្ងៃ​ទី​២ ខែ​កុម្ភៈ ចាប់​ផ្ដើម​ឈូស​ឆាយ​ទៅ​លើ​ដី​ចម្ការ​កៅស៊ូ ហើយ​បាន​បំពាន​ទៅ​លើ​ផល​ដំណាំ និង​តំបន់​កប់​សព​សហគមន៍​ជនជាតិ ខណៈ​ដែល​អាជ្ញាធរ​កំពុង​ស្វែងរក​ដំណោះស្រាយ​ការ​តាំង​ទីលំនៅ​នៅ​ដី​ចម្ការ​កៅស៊ូ​រដ្ឋ​របស់​ពលរដ្ឋ។
ប្រជាពលរដ្ឋ​រស់នៅ​ភូមិ​ថារ៉ងជង ឃុំ​អូរជុំ ស្រុក​អូរជុំ លោក សៅ ឃាន រៀបរាប់​ថា ដំណាំ​នៅ​ក្រោយ​ផ្ទះ​អ្នក​ភូមិ​ជាង ១០​គ្រួសារ មាន​ចេក ស្វាយ ត្រូវ​បាន​គ្រឿងចក្រ​ឈូស​ឆាយ​អស់។ មិន​តែ​ប៉ុណ្ណោះ គ្រឿងចក្រ​ឈូស​ឆាយ​ដី​ព័ទ្ធ​ជុំវិញ​ផ្ទះ ទុក​តែ​បរិវេណ​ផ្ទះ​ឲ្យ​ប្រជាពលរដ្ឋ​តែ​ប៉ុណ្ណោះ។ លោក​បន្ត​ទៀត​ថា ប្រជាពលរដ្ឋ​កំពុង​រង់ចាំ​ដំណោះស្រាយ​របស់​អាជ្ញាធរ ដែល​បាន​សម្រប​សម្រួល​ឲ្យ​អ្នក​ភូមិ​រង់ចាំ​ការ​ស្នើសុំ​ដី​សម្រាប់​អ្នក​ភូមិ​តាំង​ទីលំនៅ ដូច្នេះ​ក្រុមហ៊ុន​បាន​រំលោភ​បំពាន​លើ​ការ​សម្រប​សម្រួល​នេះ៖ «ថា​ចាំ​ដោះស្រាយៗ ត្រូវ​គ្នា​ចាំ​បន្ត​ធ្វើ​ការ​ទៀត ឥឡូវ​មិន​ទាន់​មាន​ដំណោះស្រាយ​ផង ឈូស​ឆាយ​បី​លើក​ហើយ។ ឥឡូវ​យើង​ទាមទារ​ចាំ​រក​ដំណោះស្រាយ​ឲ្យ​គេ​ឲ្យ​បានៗ គេ​ឲ្យ​ឈូស»
ដូច​គ្នា​នេះ​ដែរ ប្រជាពលរដ្ឋ​ជនជាតិ​ដើម​ភាគ​តិច លោក ខាម ប្រាង អះអាង​ដែរ​ថា គ្រឿងចក្រ​ក្រុមហ៊ុន​បាន​បន្ត​ឈូស​ឆាយ​លើ​តំបន់​កប់​សព​បន្ត​ទៀត ខណៈ​ដែល​ក្រុមហ៊ុន​នេះ​ធ្លាប់​បាន​រំលោភ​ឈូស​ឆាយ​ផ្នូរ​កប់​សព​ដូនតា​អ្នក​ភូមិ​ជាង ១០០​ផ្នូរ កាល​ពី​ឆ្នាំ​២០១៤។ លោក​ហៅ​ការ​ឈូស​ឆាយ​នេះ ថា​ជា​ការ​រំលោភ​សិទ្ធិ​រស់នៅ និង​វប្បធម៌​ប្រពៃណី​ជនជាតិ​ដើម។ ហេតុ​នេះ ក្រុមហ៊ុន​ត្រូវ​ទទួល​ខុស​ត្រូវ​លើ​បញ្ហា​នេះ៖ «កប់​ខ្មោច​ហ្នឹង​តាំង​ពី ៧៩ រហូត​ដល់​សព្វថ្ងៃ នៅ​តែ​ផ្នូរ​ថ្មីៗ ផ្នូរ​ចាស់​គេ​ឈូស​អស់​ហើយ ប្រហាក់​ប្រហែល​ជា ៤​ហិកតារ ប៉ុន្តែ​នៅ​តែ​គេ​ឈូស មិន​ដឹង​សង្ឃឹម​ថា​នៅ ឬ​អស់​ទេ គេ​កំពុង​ឈូស​ហ្នឹង»
អតីត​ចម្ការ​កៅស៊ូ​នៅ​ខេត្ត​រតនគិរី ជាង ៣​ពាន់​ហិកតារ​បន្សល់​តាំង​ពី​សម័យ​សង្គម​រាស្ត្រ​និយម រដ្ឋ​បាន​វិនិយោគ​ទៅ​ឲ្យ​ក្រុមហ៊ុន តាយ សេង។ បន្ទាប់​មក ក្រុមហ៊ុន តាយ សេង បាន​ផ្ទេរ​ចម្ការ​កៅស៊ូ​នេះ​ទៅ​ឲ្យ​ក្រុមហ៊ុន​ឯកជន​ចិន ឈ្មោះ ស្វីស រ៉ាប់ប៊ឺ រតនគិរី ធ្វើ​អាជីវកម្ម​បន្ត​ទៀត។ បច្ចុប្បន្ន ក្រុមហ៊ុន​នេះ​កំពុង​កាប់​ដើម​កៅស៊ូ​ចាស់​ចោល ហើយ​ដាំ​ថ្មី​ឡើង​វិញ ជាពិសេស​ចម្ការ​កៅស៊ូ​នៅ​ស្រុក​អូរជុំ។
ឆ្លើយ​តប​ការ​ចោទ​ប្រកាន់​នេះ ប្រធាន​ការិយាល័យ​រដ្ឋបាល ក្រុមហ៊ុន ស្វីស រ៉ាប់ប៊ឺ លោក ងិន បូរិន មាន​ប្រសាសន៍​បញ្ជាក់​ថា ប្រជាពលរដ្ឋ​បាន​មក​តាំង​ទីលំនៅ​លើ​ដី​ចម្ការ​កៅស៊ូ​ដែល​បាន​វិនិយោគ​ពី​រដ្ឋ ហេតុ​នេះ​ក្រុមហ៊ុន​ត្រូវ​តែ​ធ្វើ​អាជីវកម្ម​តាម​កិច្ច​ព្រមព្រៀង​វិនិយោគ។ លោក​មិន​អធិប្បាយ​ពាក់ព័ន្ធ​ការ​ឈូស​ឆាយ​ប៉ះពាល់​ផល​ដំណាំ ឬ​ផ្នូរ​កប់​សព​ប្រជាពលរដ្ឋ​នោះ​ទេ ក៏ប៉ុន្តែ​លោក​អះអាង​ថា ដី​ដែល​ក្រុមហ៊ុន​ឈូស គឺ​ជា​ចម្ការ​កៅស៊ូ​ចាស់​ត្រូវ​កាប់​ដើម​ចេញ ហេតុ​នេះ​ក្រុមហ៊ុន​ត្រូវ​ឈូស​ឆាយ​ដើម្បី​ដាំ​កៅស៊ូ​ឡើង​វិញ៖ «ឈូស​ល្ងាច​មិញ​ឈូស​លើ​ដី​យើង​តើ! ចង់​និយាយ​អ៊ីចេះ ផ្ទះ​ហ្នឹង​ធ្វើ​លើ​ដី​ចម្ការ​កៅស៊ូ យើង​អត់​ទៅ​រើ​ផ្ទះ​ទេ យើង​កាប់​ដើម​កៅស៊ូ ហើយ​យើង​មិន​ត្រូវ​រុក​រាន​ដើម្បី​ដាំ​កៅស៊ូ​ថ្មី អ៊ីចឹង​យើង​ទៅ​ធ្វើ គេ​ឃាត់ អា​ហ្នឹង​មាន​ន័យ​ថា​ម៉េច?»
ជម្លោះ​ដីធ្លី ​រតនគិរី ៦២០
ផ្ទះ​ពលរដ្ឋ​នៅ​ចំណុច​ភូមិ​ថារ៉ងជង ឃុំ​អូរជុំ ស្រុក​អូរជុំ ខេត្ត​រតនគិរី ដែល​មាន​ជម្លោះ​ដីធ្លី​ជាមួយ​ក្រុមហ៊ុន ស្វីស រ៉ាប់ប៊ឺ (Swift Rubber Rattanakiri Plantation)។ រូបថត​ថ្ងៃ​ទី​៣ ខែ​កុម្ភៈ ឆ្នាំ​២០១៥ RFA/Ratha Visal
ស្ថិតិ​របស់​អាជ្ញាធរ​ឃុំ​អូរជុំ មុន​ឆ្នាំ​២០១០ ប្រជាពលរដ្ឋ​មក​ពី​បណ្ដា​ខេត្ត​នានា និង​កម្មករ​ចម្ការ​កៅស៊ូ បាន​មក​តាំង​ទីលំនៅ​នៅ​តំបន់​នោះ​មាន ៥១​គ្រួសារ។ តួលេខ​នេះ​កើន​ឡើង​ដល់​ជាង ១០០​គ្រួសារ​ក្នុង​ឆ្នាំ​២០១៣ និង​កើន​ឡើង​ដល់​ជាង ៣០០​គ្រួសារ​នៅ​ឆ្នាំ​២០១៤។ ក៏ប៉ុន្តែ កាល​ពី​ខែ​ឧសភា គណៈកម្មការ​អាជ្ញាធរ​ខេត្ត រួម​ទាំង​ស្ថាប័ន​តុលាការ បាន​អនុវត្ត​វិធានការ​បណ្ដេញ​អ្នក​តាំង​ទីលំនៅ​នា​ឆ្នាំ​២០០៤ ឲ្យ​រុះរើ​រោង​ស្នាក់នៅ​ជាង ២០០​រោង ចេញ​ពី​ដី​ចម្ការ​កៅស៊ូ​នោះ​វិញ។ វិធានការ​នេះ ធ្វើ​ឲ្យ​អ្នក​តាំង​ទីលំនៅ​ទាំង​ចាស់​ថ្មី​ជាង ៣០០​នាក់ ធ្វើ​បាតុកម្ម​បិទ​ផ្លូវ​ទៅ​ស្រុក​អូរជុំ ប្រឆាំង​ការ​បណ្ដេញ​នេះ។ ការ​ធ្វើ​បាតុកម្ម​នេះ អាជ្ញាធរ​ខេត្ត​បាន​សម្រប​សម្រួល​ឲ្យ​ប្រជាពលរដ្ឋ​ជាង ១០០​គ្រួសារ ដែល​តាំង​ទីលំនៅ​ក្នុង​តំបន់​នោះ​យូរ​ឆ្នាំ បន្ត​រស់នៅ​ជា​បណ្ដោះអាសន្ន រង់ចាំ​អាជ្ញាធរ​ស្វែងរក​ដំណោះស្រាយ​ផ្តល់​ដី​សង្គមកិច្ច​ជូន​ពលរដ្ឋ។ ចំណែក​តំបន់​ផ្នូរ​កប់​សព​សហគមន៍​ជនជាតិ ត្រូវ​រក្សា​ទុក​ជូន​សហគមន៍​ប្រើប្រាស់​តាម​ប្រពៃណី​ដូច​ធម្មតា។
អភិបាល​រង​ខេត្ត​រតនគិរី លោក លី វិន មាន​ប្រសាសន៍​បញ្ជាក់​ថា កន្លង​ទៅ​អាជ្ញាធរ​ខេត្ត​បាន​សម្រប​សម្រួល​ឲ្យ​ក្រុមហ៊ុន​ផ្អាក​ការ​ឈូស​ឆាយ​តំបន់​មាន​ទំនាស់​ជា​បណ្ដោះអាសន្ន ក៏ប៉ុន្តែ​លោក​មិន​បាន​ដឹង​ពី​ការ​ឈូស​ឆាយ​ថ្មី​ដែល​អ្នក​ភូមិ​ចោទ​នោះ​ទេ។ លោក​អះអាង​ថា នឹង​សម្រប​សម្រួល​ជាមួយ​ក្រុមហ៊ុន​ម្តង​ទៀត ចៀសវាង​កើត​មាន​បាតុភាព​តវ៉ា​ប្រឆាំង​ពី​ពលរដ្ឋ៖ «ឲ្យ​គាត់​ផ្អាក​សិន យើង​និយាយ​គ្នា​សិន ទៅ​អា​រក​ប្រជាពលរដ្ឋ​ម៉េច​កើត។ អត់​បាន​ដាច់​ខាតៗ អ្វី​ដែល​ពាក់ព័ន្ធ​តែ​មួយ​ផ្នូរ​ក៏​អត់​ឲ្យ​ឈូស​ផង ដាច់​ខាត​ហើយ»
តួលេខ​របស់​ក្រុមហ៊ុន ស្វីស រ៉ាប់ប៊ឺ កាល​ពី​ឆ្នាំ​២០១៣ មាន​ប្រជាពលរដ្ឋ និង​កម្មករ​រស់នៅ​លើ​ដី​ចម្ការ​កៅស៊ូ​រដ្ឋ​ខុស​ច្បាប់​នៅ​ខេត្ត​រតនគិរី ជាង ២០០​គ្រួសារ នៅ​ស្រុក​អូរជុំ និង​ក្រុង​បានលុង។ បច្ចុប្បន្ន នៅ​ឃុំ​កាចាញ ក្រុម​អាជ្ញាធរ និង​ក្រុមហ៊ុន អនុញ្ញាត​ឲ្យ​ប្រជាពលរដ្ឋ​តាំង​ទីលំនៅ​បណ្ដោះអាសន្ន​លើ​ទំហំ​ក្បាល​ដី​ដែល​ប្រជាពលរដ្ឋ​ចូល​កាន់​កាប់​ជាក់ស្តែង និង​បណ្តោយ​ក្បាល​ដី ៦០​ម៉ែត្រ។
មន្ត្រី​ឃ្លាំ​មើល​សិទ្ធិ​មនុស្ស​សមាគម​អាដហុក (adhoc) ខេត្ត​រតនគិរី លោក ឆាយ ធី កត់​សម្គាល់​ថា អាជ្ញាធរ​ខេត្ត​បាន​អនុវត្ត​វិធានការ​រដ្ឋបាល​បណ្ដេញ​ប្រជាពលរដ្ឋ​មក​សង់​ខ្ទម​សំពត់​កៅស៊ូ​ជាង ២០០​ខ្ទម​ពី​តំបន់​ដី​ចម្ការ​កៅស៊ូ​នៅ​ស្រុក​អូរជុំ កាល​ពី​ឆ្នាំ​២០១៤ ហើយ​រក្សា​ទុក​តំបន់​កប់​សព និង​ដី​លំនៅឋាន​ពលរដ្ឋ​ជាង ១០០​គ្រួសារ ដើម្បី​ស្វែងរក​ដី​សម្បទាន​សង្គមកិច្ច​ជូន​ពលរដ្ឋ។ លោក​បន្ត​ថា ការ​ឈូស​ឆាយ​ទៅ​លើ​តំបន់​កប់​សព និង​ផល​ដំណាំ​ពលរដ្ឋ គឺ​ជា​ការ​រំលោភ​សិទ្ធិ​មនុស្ស សិទ្ធិ​រស់​រាន​មាន​ជីវិត​ពលរដ្ឋ​ធ្ងន់ធ្ងរ៖ «ការ​ឈូស​ទៅ​លើ​ផ្នូរ​ទៅ​លើ​ទីតាំង​ពលរដ្ឋ​កំពុង​រស់នៅ គឺ​ជា​ការ​រំលោភ​ទាំង​ស្រុង​ទៅ​លើ​ការ​រស់នៅ​របស់​ពលរដ្ឋ និង​ប្រពៃណី​វប្បធម៌​ជនជាតិ​ដើម​ហ្នឹង ព្រោះ​ការ​ឈូស​ឆាយ​ប៉ះពាល់​ផល​ប្រយោជន៍​អ្នក​ណា​មួយ ត្រូវ​តែ​ទទួល​ខុស​ត្រូវ»

Wednesday, February 4, 2015

អ្នក​ការពារ​ធនធាន​ធម្មជាតិ​ប្រឈម​នឹង​ការ​ប្ដឹងផ្ដល់​ពី​ឈ្មួញ​និង​មន្ត្រី​មាន​អំណាច

ដោយ ប្រាជ្ញ ចេវ 2015-02-04 From RFA
សកម្មភាព​ការ​រំលោភ​ដី ខេត្ត​ព្រះសីហនុ ៦២០
រូបភាព​សកម្មភាព​​​រំលោភ​ដី ប៉ះពាល់​ធនធាន​ធម្មជាតិ នៅ​ខេត្ត​ព្រះសីហនុ ត្រូវ​បាន​គេ​លើក​បង្ហាញ​ក្នុង​សន្និសីទ​កាសែត​មួយ នា​រាជធានី​ភ្នំពេញ កាល​ពី​ថ្ងៃ​ទី​៤ កុម្ភៈ ២០១៥។
អ្នក​ការពារ​ធនធាន​ធម្មជាតិ​មួយ​ចំនួន​កំពុង​ប្រឈម​នឹង​ការ​ប្ដឹងផ្ដល់​ពី​សំណាក់​ឈ្មួញ​រក​ស៊ី​ឈើ​និង​អ្នក​មាន​អំណាច ដែល​យក​ប្រព័ន្ធ​តុលាការ​មក​ចោទ​ប្រកាន់​ដើម្បី​ចាប់​ចង​ពួកគេ។ ពួកគេ​ថា ក្រៅ​ពី​ឈម​នឹង​តុលាការ អ្នក​ខ្លះ​រង​ការ​គំរាម​សម្លាប់​ប្រសិន​បើ​មិន​បញ្ឈប់​សកម្មភាព។
អ្នក​ការពារ​ធនធាន​ធម្មជាតិ​មួយ​ចំនួន​កំពុង​បង្ហាញ​ការ​ព្រួយ​បារម្ភ​ខណៈ​ដែល​ពួកគេ​កំពុង​តែ​មាន​បណ្ដឹង​នៅ​តុលាការ។ ក្តី​បារម្ភ​នេះ​បង្ហាញ​ឡើង​នៅ​ក្នុង​សន្និសីទ​កាសែត​មួយ​ នៅ​ព្រឹក​ថ្ងៃ​ទី​៤ ខែ​កុម្ភៈ នៅ​ភ្នំពេញ ដោយ​មាន​វត្តមាន​តំណាង​ពលរដ្ឋ​មាន​បញ្ហា​ដីធ្លី​នៅ​ភ្នំពេញ និង​តាម​បណ្ដា​ខេត្ត និង​សកម្មជន​ការពារ​ធនធាន​ធម្មជាតិ។
តំណាង​សកម្មជន​ការពារ​ធនធាន​ធម្មជាតិ លោក គុជ វ៉េង ឲ្យ​ដឹង​ថា លោក​ត្រូវ​ជាប់​ពន្ធនាគារ​អស់​ជាង​បី​ខែ​ដោយ​សមត្ថកិច្ច​តាម​ចាប់​ខ្លួន​លោក​ចេញ​ពី​ក្នុង​ព្រៃ ក្នុង​ពេល​ដែល​លោក​កំពុង​ការពារ​ព្រៃ​ឈើ។ លោក​ឲ្យ​ដឹង​ទៀត​ថា អ្នក​ដែល​ប្ដឹង​លោក​គឺ​ជា​ឈ្មួញ​រកស៊ី​ឈើ​ដែល​ធ្លាប់​ព្រមាន​ឲ្យ​លោក​បញ្ឈប់​ធ្វើ​សកម្មភាព​ការពារ​ព្រៃឈើ៖ «និយាយ​ទៅ​បញ្ហា​ខ្លាំង​គឺ​ខ្ញុំ​កំពុង​ប្រឈម​នឹង​ផ្លូវ​ច្បាប់»
មិន​មែន​ជា​លើក​ទី​១​ទេ ដែល​សកម្មជន​ការពារ​ព្រៃឈើ​រង​ការ​គំរាម​ប្រឈម​នឹង​ផ្លូវ​ច្បាប់​ដូច​នោះ។ កាល​ពី​ឆ្នាំ​២០១២ សកម្មជន​ការពារ​ធនធានធម្មជាតិ លោក ឈុត វុទ្ធី ត្រូវ​បាន​គេ​បាញ់​សម្លាញ់​នៅ​កណ្តាល​ព្រៃ​នា​ខេត្ត​កោះកុង ព្រោះ​សកម្មភាព​ការពារ​ព្រៃឈើ​របស់​លោក។ ក្រុម​សកម្មជន​ការពារ​ធនធាន​ធម្មជាតិ​ថា ពួកគេ​មិនដែល​ទទួល​ការពារ​ពី​រដ្ឋាភិបាល​នោះ​ទេ។
អ្នក​ការពារ​ធនធាន​ធម្មជាតិ​មួយ​រូប​ទៀត លោកស្រី មុំ សាគីម មាន​ប្រសាសន៍​ថា តាំង​ពី​ដើម​រហូត​ទល់​ពេល​នេះ លោកស្រី​ត្រូវ​ឈ្មួញ​មាន​លុយ និង​មន្ត្រី​មាន​អំណាច​ប្ដឹង​មក​តុលាការ និង​ព្រមាន​សម្លាប់​ជា​ញឹកញាប់៖ «មាន​រឿង​ច្រើន​កើត​ឡើង​ចំពោះ​ខ្ញុំ គេ​បាញ់​ដំបូល​ផ្ទះ និង​គំរាម​សម្លាប់​ជាដើម»
​តាម​របាយការណ៍​របស់​សមាគម​ការពារ​សិទ្ធិ​មនុស្ស​អាដហុក (Adhoc) នៅ​ឆ្នាំ​២០១៤ មាន​បណ្ដឹង​ចំនួន​ ១១៩​ករណី ដែល​គេ​បាន​ប្ដឹង​សកម្មជន​ការពារ​ធនធានធម្ម​ជាតិ​និង​ព្រៃឈើ​នៅ​តុលាការ។ របាយការណ៍​នោះ​បង្ហាញ​ថា មន្ត្រី​មានអំណាច ឈ្មួញ​រកស៊ី​ឈើ​និង​ពលរដ្ឋ​ជា​អ្នកប្តឹង​ក្រុម​សកម្មជន​ទាំងនោះ​។
​មន្ត្រី​ផ្នែក​ដីធ្លី​នៃ​សមាគម​ការពារ​សិទ្ធិ​មនុស្ស​អាដហុក លោក ឡាត់ គី ថា​នេះ​ជា​ល្បែង​កម្សាន្ត​របស់​ឈ្មួញ​រកស៊ី​ជួញដូរ​ព្រៃឈើ​និង​ក្រុម​មន្ត្រី​ខិលខូច ព្រោះ​អ្នក​ទាំង​នោះ​ខូច​ប្រយោជន៍​ដោយសារ​សកម្មភាព​អ្នក​ការពារ​ធនធាន​ធម្មជាតិ។ លោក​ថា រឿង​នេះ​កើត​ឡើង​ដោយសារ​កង្វះ​ការ​យក​ចិត្ត​ទុក​ដាក់​ពី​ថ្នាក់ដឹកនាំ​នៃ​រដ្ឋាភិបាល៖ «ការ​ការពារ​ផលប្រយោជន៍​សង្គម​ធ្វើ​ឲ្យ​ប៉ះពាល់ មាន​ទំនាស់​អ្នក​ប្រព្រឹត្ត​ល្មើស​ដូច​វា​តែងតែ​កើត​ឡើង​នៅ​ក្នុង​សង្គម​ខ្មែរ​ទេ»
ឆ្លើយ​តប​ការ​លើក​ឡើង​របស់​អ្នក​ការពារ​ធនធាន​ធម្មជាតិ និង​សង្គម​ស៊ីវិល ប្រធាន​អង្គភាព​ប្រតិកម្ម​រហ័ស​នៃ​ទីស្ដីការ​គណៈរដ្ឋមន្ត្រី លោក ផៃ ស៊ីផាន និយាយ​ថា សកម្មភាព​របស់​ការពារ​ធនធាន​ធម្មជាតិ​មួយ​ចំនួន​មាន​ឈ្មោះ​ល្អ ប៉ុន្តែ​បង្កប់​ការ​អនុវត្ត​ផ្ទុយ​នឹង​ច្បាប់។ លោក​បញ្ជាក់​ថា កិច្ចការ​របស់​តុលាការ​រដ្ឋាភិបាល​មិន​អាច​ជ្រៀតជ្រែក​បាន​ទេ៖ «សកម្មជន​ការពារ​ធនធាន​ធម្មជាតិ​ឃើញ​មាន​ច្រើន ប៉ុន្តែ​ទិសដៅ​សកម្មភាព​មិន​ឆ្លើយ​តប​ទៅ​នឹង​​ច្បាប់»
ទោះ​យ៉ាង​ណា​ក្តី លោក ផៃ ស៊ីផាន យល់​ថា សកម្មភាព​របស់​អ្នក​ការពារ​ធនធាន​ធម្មជាតិ​ជា​គោលដៅ​ល្អ​ក្នុង​គោលបំណង​ជួយ​លើក​កម្ពស់​ថែរក្សា​បរិស្ថាន៕

ប្រជា​សហគមន៍​ផ្លូវ​រថភ្លើង​ទាមទារ​ឲ្យ​ADB​ផ្ដល់ព័ត៌មាន​ពី​គម្រោង​អភិវឌ្ឍន៍​តាម​ការសន្យា​​


ដោយ៖​ ណាត សុភាព​ | ថ្ងៃព្រហស្បតិ៍ ទី5 កុម្ភៈ 2015, 10:08 AM​


ប្រជាសហគមន៍​ផ្លូវ​រថភ្លើង​តវ៉ា​មុខ​ធនាគារ​អភវឌ្ឍន៍​អាស៊ី នៅ​ព្រឹក​ថ្ងៃ​ព្រហស្បតិ៍​នេះ (រូបភាព៖ កាន់ វិច្ឆិកា)

​ប្រជា​សហគមន៍​រស់នៅ​តាម​បណ្តោយ​ផ្លូវ​រថភ្លើង​មាន​គ្នា​ប្រមាណ​៦០​នាក់​នៅ​ព្រឹក​ថ្ងៃ​ព្រហស្បតិ៍​នេះ​ប្រមូលផ្ដុំ​គ្នា​ជា​ថ្មី​មុខ​ធនាគារ​អភិវឌ្ឍន៍អាស៊ី​(ADB) ដើម្បី​ទាមទារ​ឲ្យ​ធនាគារ​នេះ​រៀបចំ​កិច្ចប្រជុំ​ជាមួយ​ក្រុមហ៊ុនអភិវឌ្ឍន៍​​ផ្លូវ​រថភ្លើង​​តាម​ការ​សន្យា ដើម្បី​សាកសួរ​ព័ត៌មាន​លម្អិត​ស្ដីពី​គម្រោង​សាងសង់​ផ្លូវ​រថភ្លើង ។​
​កាលពី​ថ្ងៃ​ទី​១៦ ខែ​មករា ឆ្នាំ​២០១៥ បន្ទាប់ពី​មាន​ការតវ៉ា​ពី​ប្រជាពលរដ្ឋ ធនាគារ ADB បាន​សន្យា​ជាមួយ​ប្រជា​សហគមន៍​ផ្លូវ​រថភ្លើង​ថា នឹង​ផ្តល់​ព័ត៌មាន​ពី​ការជួបប្រជុំ​សាធារណៈ​ជា​មួយ​ភាគី​ពាក់ព័ន្ធ​នៅ​ថ្ងៃ​អង្គារ ទី​២០ ខែ​មករា ទាក់ទង​នឹង​គម្រោង​សាងសង់​ផ្លូវ​រថភ្លើង​នេះ។​
​ប្រជាពលរដ្ឋ​ដែល​ចូលរួម​ធ្វើ​ការតវ៉ា​នៅ​ព្រឹក​នេះ​បានឲ្យដឹងថា កាលពី​ថ្ងៃ​ទី​២០ ខែ​មករា ADBមិន​បានរៀបចំឲ្យ​មាន​កិច្ច​ប្រជុំ​​ផ្ដល់​ព័ត៌មាន​ដូច​ការសន្យា​ទេ ដោយ​មន្ត្រី​នៅ​ធនាគារ​នេះ​បាន​ប្រាប់​ប្រជាពលរដ្ឋ​ថា មន្ត្រី​បរទេស​ដែល​ទទួល ខុសត្រូវ​លើ​កិច្ចការ​នេះ​ត្រូវមាន​ភារៈកិច្ច​ទៅ​ក្រៅប្រទេស ។​
​ពលរដ្ឋ​ឲ្យដឹង​ទៀតថា រហូតមកដល់​ពេលនេះ ពួកគេ​នៅ​មិនទាន់​ទទួលបាន​ព័ត៌មាន​ពីADB ​នៅឡើយ ទើប​ពួកគេ​នាំគ្នា​ធ្វើ​ការតវ៉ា​ជាថ្មី ដើម្បី​ទាមទារ​ឲ្យ​ស្ថាប័ន​នេះ ផ្តល់​ព័ត៌មាន​ឲ្យបាន​ជាក់លាក់ពី​ចំនួន​ម៉ែត្រ​ដែល​ត្រូវ​កំណត់​ចេញពី​ផ្លូវ​រថភ្លើង​ទៅ​ផ្ទះ​របស់​ពួកគេ ខណៈ​ពួកគេ​ព្រួយបារម្ភ​ពី​ការបណ្តេញចេញ​ពី​លំនៅដ្ឋាន​ទាំង​បង្ខំ ។​
​សហគមន៍​ទាំងនោះ​រួមមាន សហគមន៍​ភូមិ​២ ភូមិ​១៧ ភូមិ​១០៤ ភូមិ​១០៥ ភូមិ​២៣ សហគមន៍​រួមចិត្ត​តែមួយ និង​សហគមន៍​អភិវឌ្ឍន៍​ថ្មី​ជាដើម ។​
​ក្រុម​ប្រជា​សហគមន៍​បាន​ព្រមាន​ធ្វើបាតុកម្ម​ទ្រង់ទ្រាយ​ធំ ប្រសិន​បើ​ពួកគេ​នៅតែ​មិន​ទទួលបាន​ព័ត៌មាន​លម្អិត​ស្ដីពី​គម្រោង​សាងសង់​ផ្លូវ​រថ​ភ្លើង​នេះ ។​
​ភ្លាមៗ​នេះ VOD មិនទាន់​អាច​សុំ​ការឆ្លើយតប​ពី​ធនាគារ​អភិវឌ្ឍន៍​អាស៊ី (ADB)​បាន​នៅឡើយ​ទេ ។​
​គួរបញ្ជាក់​ថា ក្រុមហ៊ុន Toll Royal Railway និង​ក្រុមហ៊ុន Royal Group របស់លោក គិត ម៉េង  បាន​ទទួល​គម្រោង​សាងសង់​បណ្ដាញ​ផ្លូវដែក​កម្ពុជា ពី​រដ្ឋាភិបាល​កម្ពុជា​ចំនួន​២​ខ្សែ គឺ​ផ្លូវដែក​ពី​រាជធានី​ភ្នំពេញ ទៅ​ក្រុង​ព្រះសីហនុ  និង​ពី​ភ្នំពេញ​ទៅ​បន្ទាយមានជ័យ ។ គម្រោង​សាងសង់​ផ្លូវដែក​នេះ បាន​ធ្វើឲ្យប៉ះពាល់​ដល់​ប្រជាពលរដ្ឋ​ជាង​៣០០០​គ្រួសារ ។​
​កាលពី​ខែ​ធ្នូ ឆ្នាំ​២០១៤ ក្រុមហ៊ុន Toll Group ប្រកាសថា​បាន​លក់​ភាគហ៊ុន​៥៥​ភាគរយ​របស់ខ្លួន​នៅក្នុង​គម្រោង​សម្បទាន​ក្រុមហ៊ុន Toll Royal Railway ឲ្យទៅ Royal Group  របស់លោក គិត ម៉េង ដោយ​អះអាង​ថា មូលហេតុ​នៃ​ការសម្រេចចិត្ត​ដកខ្លួន​ចេញ ដោយសារ​ប្រាក់ចំណូល​ដែល​ទទួលបាន កាន់តែ​ទាប​ជាង​ការរំពឹងទុក រួម​ទាំង​ការបរាជ័យ និង​ការពន្យារពេល​ក្នុង​ការងារ​កែលម្អ​ផ្លូវដែក ៕