Forest in Cambodia

Friday, January 25, 2013

ខៀវសំផនអាចចេញពីពេទ្យសប្តាហ៍ក្រោយ

Friday, 25 January 2013 Justine Drennan from Phnom Penh Post

ភ្នំពេញៈប្រធាន អង្គជំនុំជម្រះ សាលាក្តីខ្មែរក្រហម បានឲ្យដឹងកាលពីម្សិលមិញថា អង្គជំនុំជម្រះ រំពឹងថា សហជនត្រូវចោទ លោក ខៀវ សំផន នឹងចេញពីមន្ទីរពេទ្យ នៅចុងសប្តាហ៍នេះ។

លោក និល ណុន បានប្រកាសបែបនេះ បន្ទាប់ពីលោកស្រី Anta Guisse' សហមេធាវីការពារលោក ខៀវ សំផន ដែលហាក់ដូចជាយល់ខុស ពីចៅក្រមទាក់ទិននឹងស្ថានភាពសុខភាព របស់កូន ក្តីលោកស្រី បានសួរថា តើមូលហេតុអ្វី អង្គជំនុំជម្រះ មិនពិចារណាសុខភាពរបស់លោក ខៀវ សំផន ខណៈពេលគ្រោងសវនាការសម្រាប់សប្តាហ៍ក្រោយ។

លោកស្រី Guisse' បានថ្លែងថា៖ «ខ្ញុំចង់ដឹងថា តើស្ថានភាពសុខភាពកូនក្តីខ្ញុំ ត្រូវបានយកមកពិចារណាដែរឬយ៉ាងណា? ខ្ញុំមិនច្បាស់ទេថា កូនក្តីខ្ញុំ អាចចូលរួមក្នុងសវនាការ នាសប្តាហ៍ក្រោយ»។

លោក ណុន បញ្ជាក់ថា កម្មវិធីសប្តាហ៍ក្រោយ គឺសាក្សីថ្មី នៅថ្ងៃចន្ទ បន្ទាប់មកសវនាការពិនិត្យឯកសារគឺជាកម្មវិធីបណ្តោះអាសន្ន ផ្អែកលើសុខភាពរបស់លោក នួន ជាបងធំទី ២ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ចាប់តាំងពីបានចូលព្យាបាលជំងឺរលាកទងសួត កាលពីថ្ងៃទី១៣ ខែមករា មក។

ហេតុអ្វីបានជាផ្លូវថ្នល់នៅស្រុកខ្មែរធ្វើជាប់ជាងគេ?

Friday, 25 January 2013 ចំប៉ា រង្ស៊ី From Phnom Penh Post

កំណាត់ផ្លូវជាតិលេខ ៦ អា នៅម្តុំស្រុកមុខកំពូលខេត្តកណ្តាល កំពុងត្រូវបានស្ថាបនាពង្រីកឲ្យធំជាងមុន។ រូបថត ហុង មិនា

ក្រសួងសាធារណការ និងដឹកជញ្ជូន ក្នុងអាណត្តិដឹកនាំដោយលោករដ្ឋមន្ត្រី ត្រាំ អ៊ីវតឹក ត្រូវបានគេមើលឃើញថា គ្មានការដឹកនាំឲ្យមានការជឿនលឿនទៅមុខទេ។ របៀបដឹកនាំរបស់គាត់ គឺប្រៀបបានទៅនឹងការជិះសេះមើលផ្កាក្នុងសួនច្បារ។ គាត់ដឹកនាំពាក់វ៉ែនតា ស ងើយលើ មើលរំលងថ្នាក់ក្រោមរហូតដើរលើផ្លូវថ្នល់មិនដឹងផ្លូវខូចរាល់ ថ្ងៃ។

អ្នកតាមដានប្រចាំការឃ្លាំមើលក្រសួងនេះ បានមើលឃើញថា កំណាត់ផ្លូវថ្នល់ចាក់កៅស៊ូជាច្រើនកន្លែង រាប់ទាំងផ្លូវក្នុងក្រុង ទីរួមខេត្តនានាស្ទើរខូចខាតអស់ រងនូវការពិបាកធ្វើចរាចរណ៍ ហើយមិនឃើញមានការជួសជុលថែទាំឲ្យបានឆាប់នោះទេ។ មធ្យោបាយធ្វើចរាចរណ៍ កាន់តែច្រើនមមាញឹក ការខូចខាតផ្លូវ កាន់តែរីកធំឡើងឆាប់រហ័ស។

ការខូចខាតផ្លូវថ្នល់ទាំងឡាយ ត្រូវបានមន្ត្រីក្រសួងភាគច្រើន ឆ្លើយដាក់ថា មកពីគ្រោះទឹកជំនន់ ដើម្បីឲ្យស្រាលបន្ទុកដែលក្រសួងទទួលខុសត្រូវ។ តែធាតុពិត ក្រសួងមិនបានចាត់ទុកថា ខ្លួនឯងគឺជាអ្នកធ្វើផ្លូវ ឬជួសជុលថែទាំផ្លូវ ដែលគ្មានគុណភាពនោះទេ។ មួយផ្នែកទៀតមន្ត្រីក្រសួង ឆ្លៀតឱកាស ចោទប្រកាន់ថា មកពីការដឹកទំនិញលើសចំណុះរបស់រថយន្តក្រុមហ៊ុនមួយចំនួនតូច បណ្តាលឲ្យខូចផ្លូវថ្នល់យ៉ាងឆាប់រហ័ស។

ក្រសួងសុខាភិបាលត្រៀមដាក់ពង្រាយបុគ្គលិកពេទ្យក្នុងពិធីដង្ហែព្រះបរមសព

Friday, 25 January 2013 មុំ គន្ធា From Phnom Penh Post
130125_04a

ស្ត្រីម្នាក់សន្លប់ត្រូវបានគេបីចេញពីហ្វូងមនុស្ស ក្នុងពិធីកាន់ទុក្ខព្រះបរមសពសម្តេចឪ កាលពីខែតុលា។ រូបថត មិនា

ភ្នំពេញៈ ក្រសួងសុខាភិបាលនឹងដាក់ពង្រាយបុគ្គលិកពេទ្យជាង ៣០០ នាក់ និងរថយន្តសាមុយ ២៥ គ្រឿង ក្នុងអំឡុងពិធីដង្ហែ និងថ្វាយព្រះភ្លើងព្រះបរមសពព្រះមហាវីរក្សត្រ នរោត្តម សីហនុ ដើម្បីដោះស្រាយបញ្ហាសុខភាព ដែលអាចកើតមាន ខណៈពេលមនុស្សរាប់លាននាក់ប្រមូលផ្តុំគ្នា ដើម្បីសម្តែងគាវរកិច្ចចុងក្រោយចំពោះព្រះបរមសព។

យោងតាម លោក សុខ សុគន្ធ ប្រធានមន្ទីរសុខាភិបាលរាជធានីភ្នំពេញបានឲ្យដឹងថា មន្ទីររបស់លោកនឹងបញ្ចូលរថយន្តសាមុយ ៩ គ្រឿង និងអ្នកវិជ្ជាជីវៈពេទ្យ ២៨៥ នាក់ពីថ្ងៃទី ១ ដល់ ៤ កុម្ភៈ ហើយមន្ទីរពេទ្យ ៧ កន្លែង គឺមន្ទីរពេទ្យកាល់ម៉ែត្រ មន្ទីរពេទ្យមិត្តភាពខ្មែរ-សូវៀត មន្ទីរពេទ្យព្រះកេតុមាលា មន្ទីរពេទ្យព្រះអង្គឌួង មជ្ឈមណ្ឌលជាតិគាំពារមាតា និងទារក មន្ទីរពេទ្យបង្អែកក្រុង និងមន្ទីរពេទ្យព្រះកុសមៈ នឹងត្រៀមខ្លួន ដើម្បីដោះស្រាយបញ្ហាអ្នកជំងឺត្រូវចូលសម្រាកពេទ្យ។ លោកបានបន្ថែមថា៖ «យើងផ្តោតការយកចិត្តទុកដាក់នៅថ្ងៃទី ១ និង ៤ កុម្ភៈ ព្រោះមានមនុស្សជាច្រើននាក់ នឹងប្រមូលផ្តុំគ្នា នៅព្រះបរមរាជវាំង និងទីវាលថ្វាយព្រះភ្លើងព្រះបរមសព»។

ប៉ូលិសក្រុងបញ្ចូនក្មេងទំនើង ៧នាក់ទៅកាន់សាលាដំបូងខេត្តព្រះសីហនុ

Friday, 25 January 2013 ឃុត សុភចរិយា From Phnom Penh Post

ក្មេងទំនើង៧នាក់ ដែលប៉ូលិសក្រុងព្រះសីហនុចាប់បញ្ជូនទៅតុលាការខេត្ត។ រូបថត នប.ជក

ព្រះសីហនុៈ កម្លាំងសមត្ថកិច្ចនគរបាលក្រុងព្រះសីហនុ កាលពីម្សិលមិញ បានបញ្ជូនក្រុមក្មេងទំនើង ៧ នាក់ ពីក្នុងបក្ខពួក១៥នាក់ ទៅសាលាដំបូងខេត្ត បន្ទាប់ពីបានចាប់ខ្លួនបានកាលពីថ្ងៃពុធ បីថ្ងៃក្រោយពីក្រុមនេះព្រួតគ្នាវាយយុវជនពីរនាក់ឲ្យសន្លប់ដេក ក្នុងថ្លុកឈាម នៅតាមដងផ្លូវ។

លោក ភុល ភស្ដា អធិការនគរបាលក្រុងព្រះសីហនុ បានប្រាប់ភ្នំពេញ ប៉ុស្តិ៍ថា ក្មេងទំនើងដែលត្រូវចាប់បញ្ជូនមកកាន់តុលាការខេត្ត មានឈ្មោះ ប៉ុន លីហ៊ាង អាយុ១៧ឆ្នាំ ជាម ប៊ុណ្ណាត អាយុ១៦ឆ្នាំ ថេន ដាលីន អាយុ១៧ឆ្នាំ គឹម សង្វាជុំ អាយុ១៧ឆ្នាំ ស៊ីវ ស៊ុយទ្រី អាយុ១៧ឆ្នាំ លី ជុងងី អាយុ១៧ឆ្នាំ និងឈ្មោះ ខៀវ ចាន់ណេត អាយុ១៦ឆ្នាំ ជាសិស្សវិទ្យាល័យហ៊ុនសែនមិត្តភាព។

លោកថ្លែងថា ៖ «យើងបានកសាងសំណុំរឿងចោទប្រកាន់ពួកគេពីបទហិង្សាដោយចេតនា និងបញ្ជូនពួកគេទៅតុលាការហើយកាលពីព្រឹកថ្ងៃព្រហស្បតិ៍ ដើម្បីធ្វើការចោទប្រកាន់និងផ្តន្ទាទោសតាមនីតិវិធីច្បាប់»។

កម្មករ៧០០នាក់ធ្វើការតវ៉ាបិទផ្លូវវេងស្រេង

Friday, 25 January 2013 មុំ គន្ធា From Phnom Penh Post

កម្មកររោងចក្រ Royal Fashion ធ្វើការតវ៉ា បិទកំណាត់ផ្លូវវេងស្រេងកាលពីម្សិលមិញ។ រូបថត វីរៈ

ភ្នំពេញៈ កម្មករជាង៧០០នាក់នៅរោងចក្រ International Royal Fashion ក្នុងខណ្ឌដង្កោ បាននាំគ្នាធ្វើការតវ៉ា ដោយបិទកំណាត់ផ្លូវវេងស្រេងប្រហែល៤ម៉ោង កាលពីម្សិលមិញដើម្បីសម្តែងការខកចិត្ត ចំពោះនិយោជកដែលមិនបានឆ្លើយតបទៅនឹងការទាមទាររបស់ ពួកគេ។

លោក សៀង សម្បត្តិ ប្រធានសហព័ន្ធសហជីពមិត្តភាពបានថ្លែងថា លោកមានក្តីបារម្ភខ្លាចថា ស្ថានភាពនៅរោងចក្រ International Royal Fashion អាចប្រែក្លាយទៅជាហិង្សា ប្រសិនបើការទាមទាររបស់កម្មករ មិនទទួលបានការឆ្លើយតបទេនោះ។

លោក បន្តថា៖ «កម្មករមានការខឹងសម្បាយ៉ាងខ្លាំងចំពោះរោងចក្រ»។ «នោះហើយជាមូលហេតុដែលពួកគេធ្វើការបិទផ្លូវ ហើយខ្ញុំភ័យខា្លចថា ពួកគេនឹងធ្វើអ្វីមួយអាក្រក់ចំពោះរោងចក្រ ប្រសិនបើពួកគេមិនអាចគ្រប់គ្រងកំហឹងរបស់ខ្លួនបាន។

តំណាង រោងចក្រម្នាក់ ដែលសុំមិនបញ្ចេញឈ្មោះ បានថ្លែងកាលពីម្សិលមិញថា តុលាការបានចេញដីការក្សាការពាររោងចក្រនេះ ដោយបញ្ជាឲ្យកម្មករត្រឡប់ចូលធ្វើការវិញក្នុងរយៈពេល៤៨ ម៉ោង ប៉ុន្តែកម្មករមិនព្រមចូលធ្វើការវិញទេ។ លោកបន្តថា៖ «ក្រុមហ៊ុនមិនអាចទទួលយកពួកគេជាកម្មករទៀតទេ ប្រសិនបើពួកគេ មិនគោរពតាមដីការក្សាការពាររបស់តុលាការ»៕ PS

ប៉ូលិសបង្ហាញមុខក្រុមចោរជំរិតធនាគារ

Friday, 25 January 2013 គឹម យុទ្ធណា From Phnom Penh Post

កំពង់ចាមបានបង្ហាញមុខជនសង្ស័យ ៦នាក់ដែលក្នុងនោះ៤នាក់ ជាបុគ្គលិកធនាគារអេស៊ីលីដា ពាក់ព័ន្ធនឹងអំពើរៀបគម្រោងប្លន់លុយពីប៉ុស្តិ៍សេវាកម្មធនាគារមួយ នៅក្នុងស្រុកស្ទឹងត្រង់ ក្រោមរូបភាពចាប់ជំរិតបុគ្គលិកគ្នាឯងធ្វើចំណាប់ខ្មាំង និងទាររកគ្រឿងញៀនដើម្បីបង្វែងដាន។

ការបង្ហាញមុខ ក្រុមជនសង្ស័យនេះ ធ្វើឡើងកាលពីព្រឹកម្សិលមិញ នៅស្នងការដ្ឋានខេត្ត ក្រោយពីកម្លាំងចម្រុះប្រមាណជាង១០០នាក់ រួមទាំងកងកម្លាំងប្រឆាំងភេរវកម្ម ក្រសួងមហាផ្ទៃបានចុះអន្តរាគមន៍ផង បានធ្វើប្រតិបត្តិការបំបែកសម្បុកក្រុមចោរ នៅពាក់កណ្តាលយប់ថ្ងៃពុធ នៅក្នុងចម្ការកៅស៊ូដ៏ក្រាស់ឃ្មឹក ក្នុងស្រុកស្ទឹងត្រង់។
លោក ឆាយ គឹមសុន ស្នងការនគរបាលខេត្តកំពង់ចាមបានថ្លែងថា ការបង្ក្រាបអំពើប្លន់ធនាគារ ដែលបានអូសបន្លាយពេលជាច្រើនម៉ោងនេះ គឺក្នុងបំណងចៀសវាងកុំឲ្យជនរងគ្រោះណាម្នាក់ ដែលសង្ស័យថា«ចំណាប់ខ្មាំង» ទទួលរងរបួសនិងស្លាប់។ លោកបញ្ជាក់ថា៖ «យើងបានពន្យារពេល គឺមកពីយើងចង់ឲ្យជនដែលស្មានថា ជាជនរងគ្រោះរួចផុតពីការស្លាប់ ប៉ុន្តែអ្វីៗទាំងអស់គឺយើងមិននឹកស្មានថា បុគ្គលិកធនាគារ ដែលគិតថាជាចំណាប់ខ្មាំងនោះ បែរជាមានគំនិតអាក្រក់បំផ្លាញខ្លួនឯងទៅវិញ»។

Frenchman’s in-laws questioned

May Titthara, Phnom Penh Post, Jan. 25 2013

Police officers investigate the crime scene where the remains of French national Laurent Vallier and his four children were discovered in Kampong Speu province in 2012. Photograph: Derek Stout/Phnom Penh Post

Relatives of a Frenchman and his children who died in mysterious circumstances more than a year ago were questioned at the Kampong Speu Provincial Court yesterday.

The questioning marks the second time in a month that the father-in-law, mother-in-law and sister-in-law of Laurent Vallier have appeared at court.

The group was brought in for questioning on January 2 after applying for titles to two pieces of property owned by Vallier.

Tit Chhoun, the father of Vallier’s wife – who died in 2010 giving birth to the youngest of the couple’s four children – said yesterday he and his wife, Sar Sarvy, and their daughter Lou On appeared at court to explain why they had applied for the land titles.

“The court said they wanted to seek the truth, so they called me for questioning, because they are suspicious over why I applied for the property of my son-in-law. I told them that what I did was following the policies of the government, according to what the village and commune chief told us,” he said.

ក្រុមគ្រួសារបុរសបារាំងដែលស្លាប់ចូលបំភ្លឺតុលាការជាលើកទី២

ម៉ៃ ទិត្យថារ៉ា ភ្នំពេញប៉ុស្តិ៍ ថ្ងៃទី២៥ មករា ២០១៣

កំពង់ស្ពឺៈ ក្រុមគ្រួសាររបស់ជនជាតិបារាំងលោក Laurant Vallier ដែលបានស្លាប់យ៉ាងអាថ៌កំបាំង ជាមួយនឹងកូនតូចៗ៤ នាក់កាលពីដើមឆ្នាំ២០១២ បានទៅបំភ្លឺនៅតុលាការខេត្តកំពង់ស្ពឺ ជាលើកទីពីរ កាលពីម្សិលមិញ ទាក់ទិនទៅនឹងករណីធ្វើប័ណ្ណកម្មសិទិ្ធ លើទ្រព្យសម្បតិ្តពីរកន្លែង របស់កូនប្រសាដែលបានស្លាប់។

លោក ទិត្យ ឈួនដែលជាឪពុក ម្តាយក្មេករបស់លោក Laurant Vallier បានឲ្យដឹងថា លោកព្រមទាំងភរិយា អ្នកស្រី សរ សាវី និងកូនស្រី លន់ អូន បានទៅឆ្លើយបំភ្លឺ នៅតុលាការកាលពីម្សិល។ លោកថ្លែងថា៖«តុលាការគេសង្ស័យថា ហេតុអ្វីបានជាខ្ញុំធ្វើប្លង់ នៅលើដីកូនរបស់ខ្ញុំ ដែលបានស្លាប់ តែខ្ញុំបានប្រាប់ថា អ្វីដែលខ្ញុំធ្វើគឺធ្វើទៅតាមមេឃុំ និងមេភូមិ បានកោះហៅខ្ញុំឲ្យទៅធ្វើ»។ លោកបានចោទសួរថា ៖«បើកូនៗ និងចៅៗរបស់ខ្ញុំ បានស្លាប់អស់ហើយ តើឲ្យអ្នកណាកាន់កាប់ដីនោះ បើមិនឲ្យដាក់ឈ្មោះខ្ញុំ ជាឪពុកក្មេក?»។ ការកោះហៅក្រុមគ្រួសារនេះទៅសាកសួរចំនួនពីរលើកមកនេះ គឺបន្ទាប់ពីគ្រួសារនេះ បានដាក់ពាក្យសុំប័ណ្ណកម្មសិទិ្ធលើទ្រព្យសម្បតិ្តពីរកន្លែង របស់លោក Laurent Vallier ដែលដីមួយកន្លែងៗមានទំហំប្រហែលជា១ ហិកតា ហើយនៅក្នុងដីនោះ មានផ្ទះនិងរោងគោ។ សាកសពរបស់លោក Vallierនិងកូនតូច៤ នាក់ និងកោដដាក់ឆ្អឹងសពប្រពន្ធរបស់គាត់ ត្រូវបានគេរកឃើញនៅក្នុងរថយន្ត របស់គាត់ ដែលលិចក្នុងស្រះ នៅខាងក្រោយផ្ទះ បន្ទាប់ពីគ្រួសារនេះ បានបាត់ខ្លួនប្រមាណ៤ ខែ។ ការស៊ើបអង្កេតបឋម បានបង្ហាញថា លោក Vallier បានធ្វើអត្តឃាត ប៉ុន្តែ ការស៊ើបអង្កេតដែលមានជំនួយពីបារាំងនៅកំពុងបន្ត។

អាជ្ញាធរនឹងពិនិត្យពលរដ្ឋរងផលប៉ះពាល់ពីការសង់ទំនប់សេសាន

Shane Worrell និង សេន ដាវិត ភ្នំពេញប៉ុស្តិ៍ ថ្ងៃទី២៥ មករា ២០១៣

ស្ទឹងត្រែងៈ យោងតាមមេឃុំបានឲ្យដឹងកាលពីម្សិលមិញថា អាជ្ញាធរនឹងចាប់ផ្តើមត្រួតពិនិត្យដីគ្រួសារប្រជាពលរដ្ឋ នៅដើមសប្តាហ៍ក្រោយ ជាការត្រៀម ដើម្បីសាងសង់ទំនប់វារីអគ្គិសនីសេសានក្រោម២ដែលនឹងបណ្តាលឲ្យអ្នកភូមិប្រហែល៥០០០ នាក់ត្រូវផ្លាស់លំនៅ។

លោក សៀក មេគង្គ មេឃុំក្រែគ ក្នុងស្រុកសេសាន បានបញ្ជាក់ថា៖ «ខ្ញុំបានជួបប្រជុំជាមួយនឹងអាជ្ញាធរខេត្ត និងក្រុមហ៊ុនចិន ដែលសាងសង់ទំនប់ កាលពីថ្ងៃអង្គារ។ ពួកគេប្រាប់ខ្ញុំថា ពួកគេនឹងចាប់ផ្តើមសិក្សាតំបន់នេះក្នុងខែកុម្ភៈ ដើម្បីឲ្យដឹងថា តើអ្នកត្រូវផ្លាស់លំនៅថ្មីមានប៉ុន្មាន។ នៅពេលពួកគេបញ្ចប់ ហើយប្រជាជនបានផ្លាស់លំនៅថ្មី ទំនប់នឹងចាប់ផ្តើមសាងសង់»។

ក្រុមហ៊ុន Royal Group កម្ពុជា សហការជាមួយនឹងក្រុមហ៊ុនចិន Hydrolancang International Energy បានប្រកាសកាលពីខែវិច្ឆិកាថា ពួកគេនឹងសាងសង់ទំនប់កម្លាំង៤០០ មេហ្គាវ៉ាត់ ក្នុងរយៈពេល៥ឆ្នាំ នៅចំណុចប្រសព្វរវាងទន្លេសេសាន និងស្រែពក។

អ្នកបឹងកក់កាន់តែបារម្ភនៅពេលក្រុមហ៊ុនធ្វើរបងព័ទ្ធដីអតីតផ្ទះពួកគាត់

ឃុត សុភចរិយា ភ្នំពេញប៉ូស្តិ៍ ថ្ងៃទី២៥ មករា ២០១៣

130125_06

អ្នកភូមិបឹងកក់ នៅក្នុងការតវ៉ាមួយ ដែលនគរបាលធ្វើការទប់ស្កាត់កាលពីពេលកន្លងមក។ រូបថត ផា លីណា

ភ្នំពេញៈ ពលរដ្ឋក្នុងសហគមន៍បឹងកក់ប្រមាណជាង៦០ គ្រួសារ ក្នុងចំណោម ៧៩៤ គ្រួសារ ដែលនៅមិនទាន់ទទួលបានប្លង់កម្មសិទ្ធិដីធ្លី បានសម្ដែងក្ដីកង្វល់កាន់តែខ្លាំងឡើង ខណៈក្រុមហ៊ុនស៊ូកាគូអ៊ីន របស់លោកឡាវ ម៉េងឃីន សមាជិកព្រឹទ្ធសភាគណបក្សប្រជាជន ធ្វើការសាងសង់របងថ្ម ហ៊ុមព័ទ្ធអតីតទីតាំងដីរបស់ពួកគាត់ មួយចំនួន ខណៈដែលនៅពុំទាន់មានដំណោះស្រាយនៅឡើយ។
លោក ដួង ឈើត អាយុ ៥១ ឆ្នាំ ដែលដីនិងលំនៅដ្ឋានរបស់គាត់ ត្រូវបានក្រុមហ៊ុន បូមខ្សាច់កប់ពន្លិចកាលពីពាក់កណា្ដលឆ្នាំ ២០១១ ដោយគ្មានសំណង សូម្បីតែមួយរៀលនោះ បាននិយាយទាំងទឹកមុខក្រៀមក្រំថា ឥឡូវនេះ ភាគីក្រុមហ៊ុន បានចាប់ផ្ដើមដំណើរការសាងសង់របងហ៊ុមព័ទ្ធដីរបស់ពួកគាត់ជិតអស់ ទៅហើយ ប៉ុន្តែដំណោះស្រាយនៅមិនទាន់មានជាសញ្ញាណាមួយ នៅឡើយទេ។ លោកថ្លែងថា៖«យើងពិតជាមានក្ដីបារម្ភខ្លាំងណាស់នៅពេលនេះ ពីព្រោះយើងនៅមិនទាន់ទទួលបានចម្លើយវិជ្ជមានណាមួយ ស្ដីពីដំណោះស្រាយ ពីអាជ្ញាធរនោះទេ ខណៈក្រុមហ៊ុន បានសាងសង់របងហ៊ុមព័ទ្ធដីរបស់យើងអស់ទៅហើយនោះ»។