Forest in Cambodia: December 2012

Monday, December 24, 2012

អ្នកនេសាទតវ៉ាប្រឆាំងនឹងការចាប់ទូក៤០គ្រឿង

Tuesday, 25 December 2012 ឃុត សុភចរិយា Phnom Penh Post

ក្រុមអ្នកនេសាទ ផ្តល់បទសម្ភាសដល់អ្នកកាសែត ខណៈកំពុងធ្វើការតវ៉ា កាលពីម្សិលមិញ។ រូបថត ហុង មិនា

ភ្នំពេញៈ ប្រជានេសាទប្រមាណជាង ១០០ នាក់ កាលពីម្សិលមិញ បាននាំគ្នាទៅតវ៉ា នៅមុខទីស្នាក់ការអធិការដ្ឋានជលផលចតុមុខ បន្ទាប់ពីមន្ត្រីជលផល បានចាប់ឃាត់ទូកនេសាទ របស់ពួកគេ មិនឲ្យនេសាទត្រី លើដងទន្លេសាប ដែលមានទីតាំងស្ថិតនៅក្នុងសង្កាត់ស្វាយប៉ាក ខណ្ឌឫស្សីកែវ។

តំណាងប្រជានេសាទ ទាំងនោះ លោកឡោះ យ៉ើ អាយុ ៤៩ ឆ្នាំ បានប្រាប់ភ្នំពេញ ប៉ុស្តិ៍ នៅឯកន្លែងជួបប្រជុំធ្វើការតវ៉ានោះថា មន្ត្រីជលផល បានចាប់ឃាត់ទុកទូកនេសាទរបស់ពួកគាត់ ចំនួនជាង ៤០ ទូក ខណៈដែលពួកគាត់ កំពុងធ្វើការនេសាទត្រីលើផ្ទៃទឹកដងទន្លេសាប ស្ថិតក្នុងសង្កាត់ស្វាយប៉ាកខណ្ឌឫស្សីកែវ ក្នុងរដូវត្រីប្រហុកនេះ ដើម្បីផ្គត់ផ្គង់ជីវភាពគ្រួសារ។ លោកបានថ្លែងថា៖ «សមត្ថកិច្ចជលផល ចាប់ឃាត់ទូករបស់ពួកយើង ដោយចោទថា ពួកយើងប្រើប្រាស់ម៉ាស៊ីនជាជំនួយក្នុងការនេសាទត្រី»។

លោកបាន បន្ថែមថា ច្បាប់បានហាមឃាត់មិនឲ្យប្រជានេសាទ ជាលក្ខណៈគ្រួសារ ប្រើប្រាស់គ្រឿងម៉ាស៊ីនជាជំនួយក្នុងការនេសាទត្រីនោះទេ ប៉ុន្តែបច្ចុប្បន្ន ប្រទេសជាតិមានការអភិវឌ្ឍជឿនលឿនទៅមុខ ហើយប្រជាជនក៏មានគំនិតអភិវឌ្ឍធ្វើការច្នៃប្រឌិតលើការនេសាទ ដែរ ដូច្នេះគួរតែកែសម្រួល[ធ្វើវិសោធនកម្ម]លើមាត្រាឬចំណុចខ្លះ ដោយមានការអនុញ្ញាតឲ្យប្រជានេសាទដើរទៅតាមការវិវឌ្ឍរបស់សង្គម ជាតិផង។

ឃាតកលាក់មុខរង់ចាំសម្លាប់មនុស្សនៅតាមផ្លូវ

Monday, 24 December 2012 តុង សុប្រាជ្ញ Phnom Penh Post

រថយន្តដឹកទំនិញបុកខ្ទេចខាងមុខក្នុងឧបទ្ទេវហេតុគ្រោះថ្នាក់ចរាចរណ៍មួយ នៅខណ្ឌឬស្សីកែវរាជធានីភ្នំពេញកាលពីពេលកន្លងទៅ។រូបថតម៉េង គីមឡុង

កាលពីខែមុននេះ នៅតាមផ្លូវជាតិលេខ១ ម្តុំរមណីយដ្ឋានទេសចរណ៍កៀនស្វាយ មានរថយន្តវ៉ាគ្នា ជ្រុលទៅបុករោងការមួយដែលសង់រោងចូលក្នុងផ្លូវជាតិលេខ១នោះ រងរបួសភ្ញៀវដែលចូលរួមក្នុងពិធីមង្គលការជាង២០នាក់។ សំណួរសួរថាតើ អ្នកណាខុស អ្នកណាត្រូវ? ឯរថយន្តដែលគេចពីគេ ទៅប៉ះរោងការនោះមិនដឹងថាត្រូវចាប់ដាក់ទោសកម្រិតណា?
រហូតមក ដល់ពេលនេះ តុលាការមិនទាន់ដោះស្រាយចេញផង។ តើមនុស្សយើងគួរទៅអង្គុយញ៉ាំការ ឬក៏ញ៉ាំបាយបុណ្យនៅលើផ្លូវសាធារណៈដែរឬអត់ បើគ្រោះថ្នាក់ចរាចរណ៍ដោយចៃដន្យដូចករណីខាងលើ?

ឧទ្ធរណ៍បើកសវនាការរឿងបក្សប្រឆាំងបញ្ជូនរបាយការណ៍យឺត

Tuesday, 25 December 2012 មាស សុខជា ភ្នំពេញប៉ុស្តិ៏

លោក ជូង ជូងី មេធាវីការពារក្តី ឲ្យគណបក្សសម រង្ស៊ី នាពេលកន្លងមក។ រូបថត ហេង ជីវ័ន

ភ្នំពេញៈ សាលាឧទ្ធរណ៍ បានបើកសវនាការ លើពាក្យបណ្តឹងឧទ្ធរណ៍ របស់គណបក្សប្រឆាំង កាលពីម្សិលមិញ បន្ទាប់ពីសាលាដំបូងរាជធានីភ្នំពេញ បានកាត់ទោសឲ្យគណបក្សនេះ បង់ពិន័យជាប្រាក់ចំនួន ៣ លានរៀល ដោយសារយឺតយ៉ាវក្នុងការបញ្ជូនរបាយការណ៍ប្រចាំឆ្នាំ ទៅក្រសួងមហាផ្ទៃ។

លោក ជូង ជូងី មេធាវីការពារគណបក្សសម រង្ស៊ី បានប្រាប់ភ្នំពេញ ប៉ុស្តិ៍ កាលពីម្សិលមិញថា លោកបានប្រាប់សាលាឧទ្ធរណ៍ថា ការកាត់ទោសដោយសាលាដំបូងរាជធានីភ្នំពេញ បង្គាប់ឲ្យគណបក្សសម រង្ស៊ី បង់ប្រាក់ ៣ លានរៀល ទៅឲ្យក្រសួងមហាផ្ទៃ គឺជារឿងអយុតិ្តធម៌ ព្រោះគណបក្ស សម រង្ស៊ី បានផ្ញើរបាយការណ៍ប្រចាំឆ្នាំ ទៅឲ្យក្រសួងមហាផ្ទៃ កាលពីថ្ងៃទី៣០ ខែធ្នូ ប៉ុន្តែពីថ្ងៃទី៣០ ខែធ្នូ ដល់ថ្ងៃទី១ ខែមករា គឺជាថ្ងៃឈប់សម្រាកជាហេតុធ្វើឲ្យរបាយការណ៍ផ្ញើដល់ក្រសួងនៅ ថ្ងៃទី២ ខែមករា នោះជាមូលហេតុនៃការបញ្ជូនរបាយការណ៍យឺតយ៉ាវ។ ទោះជាយ៉ាងណា ក្រសួងមហាផ្ទៃ ដែលជាដើមបណ្តឹង ពុំបានចូលខ្លួននៅតុលាការទេ។

រាជវង្សមួយអង្គទិវង្គត

Tuesday, 25 December 2012 សែន ដាវីត ភ្នំពេញប៉ុល៍ស

អ្នកកាន់ទុក្ខក្នុងពិធីបុណ្យសព នៅវត្តថាន់ កាលពីម្សិលមិញ។ រូបថត លីណា

ភ្នំពេញៈ ព្រះអង្គម្ចាស់មួយអង្គ អតីតមេបញ្ជាការកងទ័ពអាកាស នៅក្នុងរបបលោកសេនាប្រមុខ លន់ នល់ បានចូលទិវង្គត កាលពីថ្ងៃអាទិត្យក្នុងព្រះជន្ម៧៧ វស្សា ដោយជំងឺគាំងបេះដូង។

អ្នកអង្គម្ចាស់ក្សត្រី នរោត្តម សោមា ព្រះជន្ម ៤៣ វស្សា ដែលជាបុត្រី របស់ព្រះអង្គម្ចាស់ នរោត្តម វ៉ាត់ វ៉ានី ដែលបានយាងចូលទិវង្គត មានឲ្យដឹងថា ព្រះបិតារបស់ទ្រង់ បានចាប់ផ្ដើមមានសុខភាពមិនស្រួល ដោយសារជំងឺបេះដូង។

សពរបស់ទ្រង់ ត្រូវតម្កល់ទុក នៅឯកន្លែងបូជាសព នៅក្នុងវត្តថាន់ ក្នុងខណ្ឌចំការមន។ ព្រះអង្គម្ចាស់នរោត្តម វ៉ាត់ វ៉ានី មានបុត្រ ៦ អង្គ។ រាជបុត្រភាគច្រើន រស់នៅសហរដ្ឋអាមេរិក។

អ្នកអង្គម្ចាស់ ក្សត្រី សោម៉ាបាន បន្ថែមថា៖ «ព្រះមហាក្សត្រ ព្រះបាទ នរោត្ដម សីហមុនី ព្រះអង្គ បានយាងទៅចូលរួមពិធីបុណ្យព្រះសពនេះ កាលពីយប់មិញ»។

តុលាការសម្រេចមិនឃុំខ្លួនលោកចាន់ សុវ៉េតតែនៅរក្សាបទចោទដដែល

Tuesday, 25 December 2012 ម៉ៃ ទិត្យថារ៉ា និង Abby Seiff Phnom Penh Post

លោក ចាន់ សុវ៉េត អមដោយអ្នកគាំទ្រ អង្គការសង្គមស៊ីវិល និងអ្នកសារព័ត៌មានជាច្រើននាក់ នៅពេលដែលលោកចេញពីសាលាដំបូងរាជធានីភ្នំពេញ កាលពីម្សិលមិញ។ រូបថត ហេង ជីវ័ន

ភ្នំពេញៈ បន្ទាប់ពីធ្វើការសាកសួរអស់រយៈពេលជាងមួយម៉ោង ទាក់ទិនទៅនឹងបទល្មើសផ្តល់ជំនួយដល់ចារី សាលាដំបូងរាជធានី បានសម្រេចមិនធ្វើការឃុំខ្លួន លោក ចាន់ សុវ៉េត មន្រ្តីស៊ើបអង្កេតជាន់ខ្ពស់របស់សមាគមការពារសិទ្ធិមនុស្សអាដ ហុកទេ ប៉ុន្តែចៅក្រមស៊ើបសួរបានបដិសេធមិនលើកលែងបទចោទប្រកាន់ដោយសម្រេចឲ្យស្ថិតនៅក្រោមការឃ្លាំមើលរបស់តុលាការ។

នៅ ក្រៅបន្ទប់តុលាការកាលពីរសៀលម្សិលមិញ មជ្ឈដ្ឋានអ្នកតាមដានសិទ្ធិមនុស្សពីអង្គការអាដហុក និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិ មនុស្សកាន់តែមានអារម្មណ៍តានតឹងឡើងៗនៅពេលដែលការសាកសួរ លោកចាន់ សុវ៉េត ដែលធ្វើឡើងក្នុងលក្ខណៈបិទទ្វារ បានឈានចូលដល់ម៉ោងទីពីរ។

កម្មកររោងចក្រកាត់ដេរ Xing Chang Xing ជិត១០០០នាក់តវ៉ាលក្ខខណ្ខការងារ

Tuesday, 25 December 2012 មុំ គន្ធា និង Stephanie Ip Phnom Penh Post

កម្មករតវ៉ានៅមុខរោងចក្រ Xing Chang កាលពីម្សិលមិញ។ រូបថត វីរៈ

ភ្នំពេញៈ កម្មករជិតមួយពាន់នាក់នៅរោងចក្រកាត់ដេរ Xing Chang Xing ក្នុងខណ្ឌឫស្សីកែវ រាជធានីភ្នំពេញបានធ្វើការទាមទារលក្ខខណ្ឌការងារនៅមុខរោងចក្រកាលពីម្សិលមិញ នៅខណៈកម្មករមួយចំនួនត្រូវបានគេគំរាមសម្លាប់មុនពេលធ្វើការ តវ៉ា។

លោក ណាក់ ណម អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា CCAWDU បាននិយាយនៅឯរោងចក្រកាត់ដេរខាងលើថា កម្មករប្រហែលជា៨០ភាគរយបានឈរនៅខាងមុខរោងចក្រដើម្បីទាមទារ លក្ខខណ្ឌ៦ចំណុចសម្រាប់ការងារឲ្យកាន់តែល្អប្រសើរដល់ពួកគេ។ កម្មករនៅតែបន្តធ្វើការតវ៉ារហូតខាងក្រុមហ៊ុនយល់ព្រមតាមការ ទាមទាររបស់ពួកគេ។លោកបានបញ្ជាក់ថា៖ «យើងត្រូវការឲ្យក្រុមហ៊ុនផ្តល់ប្រាក់អាហារថ្ងៃត្រង់ទៅ កម្មករបានមួយដងក្នុងមួយសប្តាហ៍ ប្រាក់ថែទាំសុខភាព សម្អាតបង្គន់និងជួសជុលរោងចក្រឲ្យមានសុវត្ថិភាព ផ្តល់ប្រាក់២០ដុល្លារក្នុងមួយខែសម្រាប់កម្មករដែលសម្រាលកូន កសាងបន្ទប់សម្រាប់ស្ត្រីដែលបំបៅដោះកូន និងកុំកាត់ប្រាក់ខែនៅពេលកម្មករមានជំងឺដោយមានលិខិតស្នាមពី វេជ្ជបណ្ឌិត»។

២០១២ជាឆ្នាំដែលរួមរឹតទៅដោយអំពើហិង្សាដីធ្លីទាំងនៅទីក្រុងនិងជនបទ

Tuesday, 25 December 2012 ម៉ៃ ទិត្យថារ៉ា និង David Boyle The Phnom Penh Post

ភ្នំពេញៈ បន្ទាប់ពីរស់នៅ ២៨ ឆ្នាំ ក្នុងរាជធានីភ្នំពេញ ដោយបរិភោគអាហារដូចជា «ស្តេច» និងបានទៅរៀននៅសាលារៀនល្អបំផុត ការធ្វើដំណើររបស់លោក សុផល (ឈ្មោះត្រូវបានដាក់ដោយអ្នកកាសែត) ទៅជនបទ គឺជាបទពិសោធពិបាកផង និងជាបទពិសោធថ្មីដែលគួរឲ្យចាប់អារម្មណ៍ផងដែរ។
រហូតដល់ថ្ងៃមួយ ក្នុងខែមិថុនា នៅពេលគាត់ដោះដូរសម្លៀកបំពាក់ស្អាត ជាមួយនឹងភាពនឿយហត់ ដោយចូលរួមក្នុងក្រុមយុវជនស្ម័គ្រចិត្ត របស់លោកនាយករដ្ឋមន្រ្តី ហ៊ុន សែន កំហឹងលើបញ្ហាចាប់យកដីធ្លី ដែលកើតមាននៅតំបន់ដទៃទៀត ក្នុងប្រទេសកម្ពុជា ពុំត្រូវបានយុវជនមើលឃើញឡើយ។
ជាយុវជន ស្ម័គ្រចិត្តម្នាក់ នៃយុវជនស្ម័គ្រចិត្តប្រហែល ២០០០ នាក់ ដែលបានដាក់ពង្រាយដោយលោកនាយករដ្ឋមន្រ្តី ហ៊ុន សែន ជាផ្នែកមួយ នៃគម្រោងវាស់វែងដីធ្លី ដែលមានគោលបំណង ដើម្បីដោះស្រាយបញ្ហាចាប់យកដីធ្លី ដែលរីករាលដាលនៅកម្ពុជា លោក សុផល ចាប់ផ្តើមដឹងអំពីការលំបាកយ៉ាងខ្លាំង ដែលប្រជាជននៅតាមជនបទ ជួបប្រទះ ដោយសារការចាប់យកដីធ្លី។
ប៉ុន្តែក្នុងស្រុកថ្ពង ខេត្តកំពង់ស្ពឺ ជាកន្លែងដែលលោក សុផល ស្ម័គ្រចិត្តចុះវាស់ដី បញ្ហាធំបំផុត របស់យុវជនស្ម័គ្រចិត្ត មិនមែនជាជំនាញវាស់វែងដីក្មេងខ្ចីរបស់ពួកគេ ឬការទាក់ទងក្នុងភូមិឡើយ ប៉ុន្តែគឺបញ្ហានយោបាយ នៅពីក្រោយជម្លោះដ៏ក្តៅគគុកនេះ ដែលជាជម្លោះ ពាក់ព័ន្ធរហូតដល់ព្រឹទ្ធសភាកម្ពុជា។

ក្រឡាប់រថយន្តនៅកោះកុងស្លាប់៤ របួស ១៧នាក់

Monday, 24 December 2012 គឹម សារុំ Phnom Penh Post

កម្មករដែលទទួលរងរបួសពីគ្រោះថ្នាក់ចរាចរណ៍នៅខេត្ដកោះកុង ត្រូវបានដឹកមកសង្គ្រោះនៅមន្ទីរពេទ្យមិត្តភាពខ្មែរ-សូវៀតកាលពីម្សិលមិញ។ រូបថត វីរៈ

កោះកុងៈ កម្មករម៉ៅការដំឡើងបង្គោលខ្សែភ្លើងចំនួន៤នាក់បានស្លាប់ និង ១៧នាក់ទៀតរងរបួសធ្ងន់-ស្រាល ខណៈដែលរថយន្តដឹកកម្មករបានបើកចុះចំណោតហើយដាច់ ហ្វ្រាំង បណ្តាលឲ្យក្រឡាប់ នៅក្នុងភូមិអន្លង់បាក់ ឃុំតាតៃក្រោម ស្រុកកោះកុង កាលពីថ្ងៃសៅរ៍។

លោក កែវ ច័ន្ទមុនី អធិការរងនគរបាលស្រុកកោះកុងបានប្រាប់ឲ្យដឹងកាលពីម្សិលមិញថាគ្រោះថ្នាក់ចរាចរណ៍ក្រឡាប់រថយន្តបានបណ្តាលឲ្យអ្នកស្លាប់៤នាក់និងរបួសធ្ងន់ស្រាល១៧ ក្នុងនោះស្រី២នាក់។ លោកបញ្ជាក់ថា៖«រថយន្តបើកលឿន ហើយអ្នកបើកមិនស្គាល់ ៩ភូមិសាស្រ្តច្បាស់ ហើយផ្លូវមានសភាពចំណោត ហើយកោងដោយមានការបត់បែនជាច្រើនកន្លែង»។

អង្គរវត្តត្រូវដាក់បញ្ចូលក្នុង Ipads

Friday, 21 December 2012 Soo Jin Kim Phnom Penh Post

សៀមរាបៈតួអង្គ Laura Croft អាចជាមគ្គុទ្ទេសក៍មួយក្នុងចំណោមមគ្គុទ្ទេសក៍ទាំងនេះ។ មគ្គុទេ្ទសក៍ទៅកាន់អង្គថ្មីមួយសម្រាប់ Ipads បានរៀបចំឡើង ដោយអង្គការឃ្លាំមើលបេតិកភណ្ឌ ដែលជាអង្គការមិនដើម្បីប្រាក់ចំណេញ។

កម្មវិធី «An Interactive Guide to Angkor» ដែលបានដាក់លើហាង iTune របស់ក្រុមហ៊ុន Apple រៀបចំឡើងដោយលោកបណ្ឌិត Dougald O'Reilly បុរាណវត្ថុវិទូ និងនាយកអង្គការឃ្លាំមើលបេតិកភណ្ឌ ហើយបានពិពណ៌នាដោយលោក Charles Higham ជាសាស្រ្តាចារ្យ នៃការសិក្សាតំបន់អាស៊ីអាគ្នេយ៍។

លោក O'Reilly បានថ្លែងថា៖ «វាជំរុញដោយកន្លែងល្អបំផុតមួយ នៅលើពិភពលោក។ លោក O'Reilly ដែលបានរស់នៅកម្ពុជាពីឆ្នាំ ១៩៩៦ ដល់ ២០០៦ បានចាប់ផ្តើមបង្កើតអង្គការឃ្លាំមើលបេតិកភណ្ឌនៅឆ្នាំ ២០០៣ ដើម្បីជួយអភិរក្សបេតិកភណ្ឌ និងវប្បធម៌នៃព្រះរាជាណាចក្រកម្ពុជា។

លោក O'Reilly បានបន្តថា៖ « អង្គរជាកន្លែងជំរុញទឹកចិត្តខ្លាំង។ រាល់ពេលខ្ញុំបើកឡានកាត់ច្រកទ្វារអង្គរធំ ខ្ញុំមិនអាចសម្តែងទឹកចិត្តបានឡើយ ប៉ុន្តែភាពអស្ចារ្យ និងថ្លៃថ្លា នៃច្រកទ្វារ និងផ្ទៃមុខចម្លាក់ គឺជារឿងមិនគួរឲ្យជឿ»។

លោកចាន់ សុវ៉េតចូលតុលាការថ្ងៃនេះដើម្បីបញ្ជាក់ភាពស្អាតស្អំ

Abby Seiff ភ្នំពេញប៉ុស្តិ៍ ថ្ងៃទី២៤ ខែធ្នូ ឆ្នាំ២០១២

ភ្នំពេញៈ មិនដល់២៤ម៉ោងមុនការចូលបង្ហាញខ្លួនតាមកាលកំណត់នៅសាលា ដំបូងរាជធានីនៅថ្ងៃនេះសម្រាប់ការសាកសួរពាក់ព័ន្ធនឹងការ ចោទប្រកាន់បទផ្តល់ជំនួយដល់មេក្រុមតំបន់អបគមន៍ខេត្ត ក្រចេះ លោក ចាន់ សុវ៉េត មន្រ្តីស៊ើបអង្កេតជាន់ខ្ពស់នៅអង្គការសិទ្ធិមនុស្សអាដហុក បានថ្លែងថា លោកមានជំនឿថា លោកនឹងអាចដើរចេញមកវិញនៅរសៀលនេះដោយគ្មានការចាប់ខ្លួន។
លោក បានប្រាប់ភ្នំពេញ ប៉ុស្តិ៍កាលពីម្សិលមិញថា៖ «ខ្ញុំគ្មានកំហុស។ ខ្ញុំមិនដែលប្រព្រឹត្តអ្វីខុសទេ»។ «ខ្ញុំគិតថា តុលាការនឹងមិនយកខ្ញុំទៅដាក់ពន្ធនាគារទេ ពីព្រោះមិនមានភស្តុតាងគ្រប់គ្រាន់»។

បើយោងតាមមេធាវីលោក សុវ៉េត លោក សម សុខអឿន បានឲ្យដឹងថា លោក ចាន់ សុវ៉េត ត្រូវបានចោទប្រកាន់ពាក់ព័ន្ធនឹងការផ្តល់ជំនួយដល់លោក ម៉ា ឆាងដែលជាបុរសម្នាក់ក្នុងចំណោមបុរស៥នាក់ ដែលរដ្ឋាភិបាលនិយាយថា ជាមេគំនិតចលនាតំបន់អបគមន៍ក្នុងភូមិប្រមា។ កម្លាំងប្រដាប់អាវុធបានចុះទៅបង្ក្រាបចលនានេះ ដោយក្នុងនោះបានបាញ់ក្មេងស្រីអាយុ១៤ឆ្នាំម្នាក់ស្លាប់ និងបានបណ្តេញប្រជាជនជាច្រើននាក់ចេញពីតំបន់ដែលមានជម្លោះ ជាមួយនឹងក្រុមហ៊ុនកៅស៊ូឈ្មោះ Casotim ហើយមួយថ្ងៃបន្ទាប់ពីនោះ មន្រ្តីអាជ្ញាធរបានហៅ លោក ឆាង និងបុរសបួននាក់ទៀតថា ជាមេក្រុមចលនាតំបន់អបគមន៍។

លោក ចាន់ សុវ៉េត ត្រៀមខ្លួនចូលបំភ្លឺតុលាការនៅថ្ងៃ២៤ ធ្នូ

វណ្ណ វិចារ វិទ្យុអាស៊ីសេរី ថ្ងៃទី២៣ ខែធ្នូ ឆ្នាំ២០១២

សកម្មជនការពារសិទ្ធិមនុស្សនៃសមាគមអាដហុក គឺលោក ចាន់ សុវ៉េត នឹងត្រូវចូលខ្លួនទៅឆ្លើយបំភ្លឺនៅសាលាដំបូងរាជធានីភ្នំពេញ នៅរសៀលថ្ងៃច័ន្ទ ទី២៤ ធ្នូ ពាក់ព័ន្ធនឹងសំណុំរឿងបង្កើតតំបន់អបគមន៍នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។

លោក ចាន់ សុវ៉េត សកម្មជនការពារសិទ្ធិមនុស្ស នឹងត្រូវចូលខ្លួនទៅបំភ្លឺចំពោះមុខចៅក្រមស៊ើបសួរសាលាដំបូងរាជធានីភ្នំពេញ។ ប៉ុន្តែសមាគមអាដហុក មិនបានរៀបចំឲ្យមានការចូលរួមគាំទ្រណាមួយពីសំណាក់ប្រជាពលរដ្ឋនោះឡើយ។

មន្ត្រីជាន់ខ្ពស់របស់សមាគមអាដហុក និងលោក ចាន់ សុវ៉េត ខ្លួនឯង សុទ្ធតែត្រៀមខ្លួនរួចជាសម្រេចដើម្បីដោះបន្ទុកឲ្យរួចពីការចោទប្រកាន់ក្នុងសំណុំរឿងបង្កើតតំបន់អបគមន៍នេះ។

ប្រធានផ្នែកបច្ចេកទេសអង្កេតសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថា ការចោទប្រកាន់កន្លងទៅមិនត្រឹមត្រូវនោះទេ ព្រោះថា លោក ចាន់ សុវ៉េត មិនបានធ្វើអ្វីឲ្យផ្ទុយនឹងច្បាប់ឡើយ។ លោកបន្តថា សមាគមអាដហុក បានត្រៀមមេធាវី ៣នាក់ សម្រាប់ការពារក្តីឲ្យលោក ចាន់ សុវ៉េត តែអាដហុក មិនបានរៀបចំឲ្យមានពលរដ្ឋគាំទ្រទេ។

លោក នី ចរិយា បញ្ជាក់ថា កន្លងទៅសង្គមស៊ីវិលនានា និងម្ចាស់ជំនួយមានការគាំទ្រ និងជំរុញលើកទឹកចិត្តយ៉ាងខ្លាំងក្លាដល់លោក ចាន់ សុវ៉េត ព្រោះថា លោកបានធ្វើការងារយ៉ាងសកម្មក្នុងការជំរុញការគោរពសិទ្ធិមនុស្ស និងនីតិរដ្ឋនៅកម្ពុជា៖ «យើងធ្វើការដោះស្រាយទៅតាមផ្លូវច្បាប់ ទៅតាមនីតិវិធី យើងមិនប្រើប្រាស់នីតិវិធីផ្សេងក្រៅពីផ្លូវច្បាប់នោះទេ។ យើងសូមអរគុណចំពោះសង្គមស៊ីវិលនានា ដែលគាំទ្រលោក ចាន់ សុវ៉េត។ យើងមានភស្តុតាងបង្ហាញចៅក្រមស៊ើបសួរពីសកម្មភាពរបស់អាដហុក និងលោក ចាន់ សុវ៉េត ថាមិនមានអ្វីផ្ទុយនឹងច្បាប់ទេ»។

អ្នកភូមិស្នើក្រុមនិស្សិតទៅវាស់ដីជម្លោះ

សែន ដាវីត ភ្នំពេញប៉ុស្តិ៍ ថ្ងៃទី ២១ ធ្នូ ២០១២

អ្នកភូមិនៅស្រុកបទុមសាគរ ធ្វើការតវ៉ា កាលពីឆ្នាំមុន។ រូបថត ម៉ៃ ទិត្យថារ៉ា

កោះកុងៈ ប្រជាពលរដ្ឋប្រមាណ ២០នាក់ ដែលរស់នៅក្នុងស្រុកចំនួនពីរ បាននាំគ្នាទៅធ្វើការតវ៉ា នៅខាងមុខសាលាខេត្តកោះកុងកាលពីម្សិលមិញ ដើម្បីស្នើសុំឲ្យអាជ្ញាធរ បញ្ជូនក្រុមនិស្សិត របស់លោកនាយករដ្ឋមន្ត្រី ចុះទៅវាស់វែងដីធ្លី របស់ពួកគេ ដែលមានជម្លោះដ៏រ៉ាំរ៉ៃ ជាមួយក្រុមហ៊ុនចិន Union Development Group។

អ្នកស្រី ម៉ឹង អាន តំណាងអ្នកភូមិ បានថ្លែងថា អ្នកភូមិមកពីស្រុកបទុមសាគរ និងគិរីសាគរ បានកើតមានជម្លោះដីធ្លី ជាមួយក្រុមហ៊ុនចិនជាច្រើនឆ្នាំមកហើយ ពុំមានអាជ្ញាធរណាយកចិត្តទុកដាក់ធ្វើការដោះស្រាយឡើយ។ អ្នកភូមិបានរង់ចាំក្រុមនិស្សិតរបស់លោកនាយករដ្ឋមន្ត្រី ចុះមកវាស់ដី ជាច្រើនខែមកហើយ ប៉ុន្តែមិនឃើញចុះមកឡើយ ទើបអ្នកភូមិនាំគ្នាមកតវ៉ា នៅមុខសាលាខេត្ត។ អ្នកស្រីបានបញ្ជាក់ថា៖«បើដីយើង ត្រូវបានយុវជនស្ម័គ្រចិត្តរបស់សម្តេច ចុះមកវាស់វែងឲ្យ យើងនឹងមានប័ណ្ណកម្មសិទ្ធិស្របច្បាប់ ដូច្នេះ ក្រុមហ៊ុន មិនអាចមករំលោភយកដីយើងហើយបង់ប្រាក់សំណង បន្តិចបន្តួចបាននោះទេ»។ អ្នកស្រីបានចោទសួរថា៖«ហេតុអ្វីបានជាអាជ្ញាធរ មិនអនុញ្ញាតឲ្យក្រុមយុវជនស្ម័គ្រចិត្ត របស់សម្តេចហ៊ុន សែន ចុះវាស់វែងដីឲ្យពួកយើង?»។

អ្នកបឹងកក់មានទំនុកចិត្តចំពោះ WB

ឃុត សុភចរិយា ភ្នំពេញប៉ុស្តិ៍ ថ្ងៃទី២១ ធ្នូ ២០១២

ភ្នំពេញៈ ក្រុមអ្នកតវ៉ា មានទំនុកចិត្តថា ធនាគារពិភពលោក(WB)នឹងនៅតែផ្អាកការផ្តល់កម្ចីដល់កម្ពុជា រហូតទាល់តែជម្លោះដីធ្លី នៅតំបន់បឹងកក់ត្រូវបានដោះស្រាយ។ នេះបើយោងតាមតំណាងអ្នកភូមិដែលបានថ្លែង។

ខណៈកំពុងមានការ តវ៉ានៅខាងក្រៅ តំណាងចំនួន៧នាក់បានជួបជាមួយ លោក Alassane Sow អ្នកគ្រប់គ្រងប្រចាំប្រទេសរបស់ធនាគារពិភពលោក នៅការិយាល័យរបស់លោកនៅមហាវិថីនរោត្តម ហើយក្រុមអ្នកតំណាង បានអះអាងថា លោកបានធ្វើការសន្យាខ្លាំងក្លាមួយដើម្បីជួយពួកគេ។

លោក ដួង គា តំណាងប្រជាជននៅតំបន់បឹងកក់ បានថ្លែងបន្ទាប់ពីជួបជាមួយលោកAlassane Sow ថា៖ «យើងមានសេចក្តីរីករាយ»។ លោកបន្តថា៖«លោក Alassane Sow អះអាងថា គាត់នឹងបន្តផ្អាកកម្ចីដល់រដ្ឋាភិបាល ប្រសិនបើមិនមានដំណោះស្រាយដល់ជម្លោះដីធ្លីរបស់យើងក្នុងលក្ខណៈ តម្លាភាពទេនោះ»។ ធនាគារពិភពលោកបានផ្តល់កម្ចីចុងក្រោយដល់កម្ពុជាក្នុងខែធ្នូ ឆ្នាំ ២០១០ និងបានប្រកាសកាលពីខែសីហា ឆ្នាំមុនថា ខ្លួននឹងមិនផ្តល់កម្ចីដល់រដ្ឋាភិបាលទៀតទេរហូតទាល់តែរដ្ឋាភិបាល ដោះស្រាយជម្លោះនៅតំបន់បឹងកក់ចប់សព្វគ្រប់។ ក្រោយមកលោកនាយករដ្ឋមន្រ្តី ហ៊ុន សែន បានប្រកាសកាត់ដីចំនួន១២,៤៤ ហិកតា ដើម្បីផ្តល់ទៅឲ្យគ្រួសារជាង ៧៥០ គ្រួសារនៅតំបន់បឹងកក់ ហើយដែលការកំណត់ចែកដីនេះមិនទាន់ត្រូវបានដោះស្រាយរហូតមកដល់ពេលនេះ។

អ្នករត់ចោលម៉ម សូណង់ដូត្រូវតែងតាំងជាទីប្រឹក្សារដ្ឋាភិបាល

មាស សុខជា ភ្នំពេញប៉ុស្តិ៍ ថ្ងៃទី២១ ធ្នូ ២០១២

ភ្នំពេញៈ មេដឹកនាំសមាគមអ្នកប្រជាធិបតេយ្យរបស់លោកម៉ម សូណង់ដូ ៣ នាក់ ត្រូវបានតែងតាំង និង ៨ នាក់ផ្សេងទៀត នឹងត្រូវតែងតាំងជាទីប្រឹក្សារបស់រដ្ឋាភិបាល នៅពេលដែលពួកគេ រត់ចោលលោកម៉ម សូណង់ដូ ដែលកំពុងជាប់ឃុំ ហើយទៅចុះចូលជាមួយគណបក្សហ៊្វុនស៊ិនប៉ិច។ នេះបើតាមមន្ត្រីសមាគមអ្នកប្រជាធិបតេយ្យ និងលោកញឹក ប៊ុន ឆៃ ប្រធានប្រតិបត្តិគណបក្សហ៊្វុនស៊ិនប៉ិច។

លោក ជា បំរ៉ុង អនុប្រធានសមាគមអ្នកប្រជាធិបតេយ្យ បានប្រាប់ភ្នំពេញ ប៉ុស្តិ៍ កាលពីម្សិលមិញថា លោកនិងសមាជិកគណៈកម្មាធិការអចិន្រៃ្តយ៍ ៩ នាក់ទៀត និងមេដឹកនាំ ៣៣ នាក់ ក្នុងខេត្តក្រុង១១ បានសម្រេចចិត្ត ចូលរួមជាមួយគណបក្សហ៊្វុនស៊ិនប៉ិច ដោយសារបាត់បង់ទំនុកចិត្តលើសមាគម បន្ទាប់ពីពួកគេបានព្យាយាមបម្រើ និងខំរកគន្លឹះជួយលោក ម៉ម សូណង់ដូ ពីពន្ធនាគារ មិនបានជោគជ័យ។

លោក បញ្ជាក់ថា៖«ខ្ញុំបានចរចាជាមួយនឹងឯកឧត្តម ញឹក ប៊ុនឆៃ ៣‑៤ ដងថាខ្ញុំចង់ចូលរួមដើរតាមមាគ៌ារបស់ព្រះមហាវីរក្សត្រ [នរោត្តម សីហនុ]។ សមាគមបានឈានដល់ផ្លូវជាប់គាំងដែលមិនអាចទៅមុខទៀតបានទេ»។

តុលាការយោធាកោះហៅអ្នកយកព័ត៌មានកាសែតភ្នំពេញប៉ុស្តិ៍

ឡេង ម៉ាលី វិទ្យុអាស៊ីសេរី ថ្ងៃទី២៣ ខែធ្នូ ២០១២

យកព័ត៌មានឱ្យកាសែតភ្នំពេញ ប៉ុស្តិ៍ (Phnom Penh Post) មួយរូប ត្រូវតុលាការយោធាកោះហៅឱ្យចូលទៅឆ្លើយបំភ្លឺនៅថ្ងៃទី២៤ ខែធ្នូ ឆ្នាំ២០១២ ទាក់ទងនឹងអត្ថបទរបស់ខ្លួនដែលសរសេរអំពីការឈូសឆាយយកដីរបបយោធានៅស្រុកត្រពាំងប្រាសាទ ខេត្តឧត្តរមានជ័យ។

អ្នកយកព័ត៌មានឱ្យកាសែត ភ្នំពេញ ប៉ុស្តិ៍ គឺលោក ប៊ុត រស្មីគង្គា ថ្លែងថា លោកនឹងចូលទៅឆ្លើយបំភ្លឺតាមការកោះហៅរបស់លោក ប៉ោក ប៉ន ជាអនុប្រធានតុលាការយោធា និងជាចៅក្រមស៊ើបសួរ នៅម៉ោង ៨ ព្រឹក ថ្ងៃទី ២៤ ធ្នូ ឆ្នាំ ២០១២ បើទោះជាមានការព្រួយបារម្ភខ្លះៗ អំពីសុវត្ថិភាពក្ដី៖ «ឥឡូវនេះខ្ញុំព្រួយបារម្ភ ខ្វល់ថា តើគេហៅទៅហ្នឹងក្នុងបទបរិហារកេរ្តិ៍ បទផ្ដល់ព័ត៌មានមិនពិត ឬក៏ជាសាក្សី ឈ្លេចសួរពីរឿងអត្ថបទដែលខ្ញុំបានចុះផ្សាយហ្នឹងបាទ!»។

លោក ប៊ុត រស្មីគង្គា មានប្រសាសន៍ឱ្យថា នៅក្នុងដីកាកោះចេញដោយលោក ប៉ោក ប៉ន អនុប្រធានតុលាការយោធា និងជាចៅក្រមស៊ើបសួរ គឺតម្រូវឱ្យលោកចូលខ្លួនទៅបំភ្លឺពីបទព្រហ្មទណ្ឌ ទាក់ទងនឹងអត្ថបទរបស់លោក ចុះផ្សាយក្នុងកាសែតភ្នំពេញ ប៉ុស្ដិ៍ កាលពីថ្ងៃទី ២៥ ខែមិថុនា ឆ្នាំ ២០១២ ដែលថា លោកឧត្ដមសេនីយ៍ផ្កាយមាស ៤ គន់ គីម ពាក់ព័ន្ធនឹងការកាត់យកដីរបបយោធា ៥ ពាន់ហិកតារ លក់ឲ្យក្រុមហ៊ុនវៀតណាម ពីរ គឺក្រុមហ៊ុនតៃនិញ សៀមរាប និងក្រុមហ៊ុន បេស រ៉ូយ៉ាល់ (Best Royal)។ បញ្ហានេះ ធ្វើឱ្យប៉ះពាល់ជីវភាពរបស់គ្រួសារកងទ័ព។

Boeng kak resident protest

By Long kimhean

Today, morning 8.30 am beoung kak resident come from protest in front of ministry of council.

Forest in Cambodia

Pages