ជនជាប់ចោទជះទឹកអាស៊ីតលើប្រពន្ធ ត្រូវជាប់គុក៥ឆ្នាំ។ រូបថត សហការី
ភ្នំពេញៈ សំណុំរឿងប្តីជះទឹកអាស៊ីតលើប្រពន្ធ ក្នុងខែសីហា ឆ្នាំមុន កាលពីម្សិលមិញ ត្រូវសាលាដំបូងរាជធានីភ្នំពេញ សម្រេចកាត់ទោសដាក់ពន្ធនាគារ៥ឆ្នាំ ក្រោមការចោទពីបទហិង្សាដោយចេតនាប្រើទឹកអាស៊ីតខ្លាំង តាមមាត្រា ២០ នៃច្បាប់អាស៊ីត។
លោក សួស សំអាត ប្រធានក្រុមប្រឹក្សាជំនុំជម្រះបានប្រកាសសាលក្រមផ្តន្ទាទោសឈ្មោះ ប៊ី សឿន ហៅចម្ប៉ា ភេទប្រុស អាយុ ៤៩ឆ្នាំ ឲ្យជាប់ពន្ធនាគារ៥ ឆ្នាំ ពីបទហិង្សាដោយចេតនាប្រើទឹកអាស៊ីតលើប្រពន្ធខ្លួន កាលពីថ្ងៃទី៥ ខែសីហា ឆ្នាំ២០១២ នៅនឹងផ្ទះគ្មានលេខ ក្នុងសង្កាត់ទំនប់ទឹក ខណ្ឌចំការមន ហើយបានបង្គាប់ឲ្យសងជំងឺចិត្តទៅជនរងគ្រោះ១០លានរៀល តាមមាត្រា៣៥៥ នៃក្រមនីតិវិធីព្រហ្មទណ្ឌ និងបានច្រានចោលការទាមទារលើសពីនេះ។ លោកបញ្ជាក់ថា៖ «ប្រសិនបើជនជាប់ចោទមិនពេញចិត្ត នឹងសេចក្តីសម្រេចនេះ អាចប្តឹងឧទ្ធរណ៍តាមច្បាប់កំណត់បាន»។
ជនជាប់ចោទ ប៊ី សឿន បាននិយាយក្នុងសវនាការថា៖ «ខ្ញុំបានជះទឹកអាស៊ីតលើមែន តែមិនបានគិតទុកជាមុនទេ។ ខ្ញុំមានកូន៤នាក់ ខ្ញុំសុំឲ្យតុលាការបន្ធូរបន្ថយទោស ដើម្បីឆាប់បានទៅចិញ្ចឹមកូនវិញ»។
ជនរងគ្រោះ ញឹម ស្រីដា អាយុ៣២ឆ្នាំថា ប្រាប់តុលាការថា នៅថ្ងៃកើតហេតុប្តីនាងមកឌឺដងឲ្យពេលនាងកំពុងលេងបៀរថា«បើ នាងឯងការ ហៅអញស៊ីការផង»នាងថា«ចាំការចាំអញហៅ»។ លុះដើរចេញមកប្តីនាងរត់តាមមកជះទឹកអាស៊ីតលើនាងតែម្តង។ នាងថា៖«ខ្ញុំទាមទារសំណង២០លានរៀល និងសុំឲ្យតុលាការផ្តន្ទាទោសគាត់តាមច្បាប់»។
ក្រោយមក ដោយជនរងគ្រោះបានលួងលោម ប៊ី សឿន ពេលទូរស័ព្ទមកសួរសុខទុក្ខឲ្យមកជួយចេញថ្លៃព្យាបាលរបួសនៅក្នុងមន្ទីរពេទ្យព្រះកុសុមៈ ជននេះក៏ត្រូវសមត្ថកិច្ចឃាត់ខ្លួនបានក្នុងពេទ្យនៅថ្ងៃទី៦ ខែសីហា ២០១២។
ចំពេលដែលតុលាការរាជធានី កាត់ទោសលើសំណុំរឿងជះទឹកអាស៊ីតលើប្រពន្ធនេះ នៅឯខេត្តស្វាយរៀង មន្ត្រីកងរាជអាវុធហត្ថ បានបញ្ជូនទឹកអាស៊ី២៥ប៊ីដុង ចំណុំជាង១ពាន់លីត្រទៅសាលាដំបូងខេត្ត បន្ទាប់ពីសមត្ថកិច្ចខេត្តស្ទាក់ចាប់ពីរថយន្តមួយគ្រឿង កាលពីថ្ងៃទី២៧ ខែមករា នៅឃុំកណ្តៀងរាយ ស្រុកស្វាយទាប។
លោក គឹម សុខសង្វាត មន្ត្រីកងរាជអាវុធហត្ថខេត្តប្រាប់ថា ព្រះរាជអាជ្ញាមិនឲ្យឃាត់ខ្លួនអ្នកបើកបរនិងព្រូឡានទេ។ តែទឹកអាស៊ីត និងរថយន្តបានបញ្ជូនទៅសាលាដំបូងខេត្តហើយ តាមមាត្រា៤ នៃច្បាប់ស្តីពីទឹកអាស៊ីត៕
No comments:
Post a Comment
I like Blogger